Картошка экиладиган майдонларга 58,5 минг тонна уруғлик картошка етишмаяпти - «Ўзагроинспекция»

2021 йил ҳосили учун Ўзбекистондаги асосий майдонларнинг 166,3 минг гектарига сабзавот, 71,5 минг гектарига полиз ва 50,7 минг гектарига картошка экиш белгиланган.

Бу ҳақда Kun.uz’га Вазирлар Маҳкамаси ҳузуридаги «Ўзагроинспекция» ахборот хизмати раҳбари Холида Шодиева маълум қилди.

Шунингдек, унинг маълумот беришича, боғ-ток қатор ораларига 65,1 минг гектар майдонга сабзавот, 8,2 минг гектар майдонга полиз ва 2,9 минг гектар майдонга картошка экиш кўзда тутилган.

Холида Шодиеванинг айтишича, инспекция томонидан 2021 йил ҳосили учун асосий ва боғ-ток қатор ораларига экиладиган экинларнинг жойлаштирилиши ҳамда талаб этиладиган, мавжуд ва етишмайдиган уруғликлар борасида ўрганишлар ўтказилган.

«Ўрганиш натижаларига кўра, бугунги кунда асосий ва боғ-ток қатор ораларига экиладиган сабзавот уруғликларининг 14 минг 477 тоннаси ҳамда полиз уруғликларининг 70,4 минг тоннаси мавжуд эканлиги маълум бўлди.

Шунингдек, жорий йилда 53,6 минг гектар картошка экиладиган майдонларга 188 минг тонна уруғлик картошка талаб этилиб, бугунги кунда 58,5 минг тонна уруғлик картошка етишмаслиги аниқланган», – деди у.

Таъкидланишича, ҳозирда инспекциянинг ҳудудий бошқармалари томонидан 2021 йил ҳосили учун экиладиган майдонларда етишмайдиган экинларнинг уруғликлари тўғрисидаги маълумотларни хокимликларга етказиш, уруғликларнинг давлат стандарти талаблари доирасида сақланиши, фермер хўжаликлари ва қишлоқ хўжалиги корхоналарига ўз вақтида сифатли етказиб берилиши бўйича ишлар олиб борилмоқда.