Тошкентда 8 ойлик фарзандини 10 минг долларга сотган аёл ушланди

Янгиҳаёт туманида 8 ойлик фарзандини 10 минг АҚШ долларига сотган фуқаро ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Қайд этилишича, Бош прокуратура ҳузуридаги департаментнинг Янгиҳаёт туман бўлими томонидан Давлат хавфсизлик хизматининг Тошкент шаҳар бошқармаси билан ҳамкорликда тезкор тадбир ўтказилган.

Тадбир давомида, фуқаро Н.Ж. (аёл) фуқаро Н.га 2020 йил июл ойида туғилган ўғил фарзандини 10 000 АҚШ долларига сотган вақтида ашёвий далиллар билан ушланган.

Мазкур ҳолат юзасидан Н.Ж.га нисбатан Жиноят кодексининг 135-моддаси (одам савдоси) билан жиноят иши қўзғатилиб, тергов ҳаракатлари ўтказилмоқда.