Германияда «Спутник V»ни Евроиттифоқда тезроқ рўйхатдан ўтказишга чақиришмоқда

Евроиттифоқда Россиянинг коронавирусга қарши «Спутник V» вакцинасини рўйхатдан ўтказиш тўғрисидаги қарор «имкон борича тезроқ» қабул қилиниши лозим. Бавария ҳукумати раҳбари Маркус Зёдер «Passauer Neue Presse» ва «Donaukurier» газеталарига берган интервьюсида ана шундай фикр билдирди.

«Биринчи хариддан олган салбий тажрибамиздан хулоса чиқаришимиз керак, — деди Зёдер ЕИ AstraZeneca вакцинаси билан ҳали ҳам таъминланмаганини назарда тутиб. — Айнан шу сабабли ЕИ бу сафар қанча лозим бўлса шунча вакцина олиш учун тезроқ барча шартномаларни тузиши керак», — деб таъкидлади у.

«Спутник V» вакцинасидан фойдаланиш ғоясини Тюрингия ҳукумати раҳбари Бодо Рамелов ҳам қўллаб-қувватлади.

«Спутник V» Россияда ишлаб чиқарилгани учун эмас, балки сотиб олишимиз мумкин бўлган барча вакциналарни харид қилишимиз зарур деб ҳисоблаганим учун буни қўллаб-қувватлаяпман», — деди Рамелов Welt нашрига берган интервьюсида.

Унинг сўзларига кўра, «Спутник V» ҳам бошқа вакциналар каби текширувдан ўтиши шарт. Аммо уни сотиб олиш тўғрисидаги ҳадли шартномани аллақачон тузиш керак эди, деди у.

Ҳозирда ЕИда BioNTech/Pfizer, Moderna, AstraZeneca ва Johnson & Johnson компанияларининг вакциналари рўйхатдан ўтказилган. 

26 март куни Франция ташқи ишлар вазири Жан-Ив Ле Дриан Москвани «Спутник V» вакцинасидан «тарғибот қуроли» сифатида фойдаланаётганликда айблади. Германия ҳукумати эса агарда ЕМА маъқуллайдиган бўлса, Россия вакцинасидан фойдаланишга тайёрлигини билдирди.