Божхона йиғимлари бўйича янги тартиб тасдиқланди

Товарлар ва транспорт воситаларини белгиланган жойлардан ташқарида ва (ёки) божхона органларининг иш вақтидан ташқари вақтда божхона расмийлаштирувидан ўтказганлик учун (қўшимча) божхона йиғимлари ундирилади.

Бу – 2021 йил 25 мартда тасдиқланган Давлат божхона қўмитасининг «Товарлар ва транспорт воситаларини белгиланган жойлардан ташқарида ва (ёки) божхона органларининг белгиланган иш вақтидан ташқари вақтда божхона расмийлаштирувидан ўтказганлик учун божхона йиғимларини ундириш тартиби тўғрисида»ги қарорида назарда тутилган. 

Божхона йиғимини кимлар тўлайди?

Белгиланган жойлардан ташқарида ёки божхоначиларнинг иш вақтидан ташқари вақтда божхона расмийлаштирувидан ўтказишга тўғри келганда манфаатдор шахс маълум миқдорда божхона йиғимини тўлайди.

Манфаатдор шахс белгиланган жойлардан ташқарида божхона расмийлаштирувидан ўтказишни сўраб божхона органига ёзма ёки электрон шаклда мурожаат қилиши мумкин.

Божхона йиғимини ундириш тартиби қандай бўлади?

Божхона йиғимлари божхона кўриги ва божхона назорати остидаги товарларни кўздан кечириш, қайта юклаш операцияларини амалга ошириш учун божхона йиғимлари буюртма-нарядни расмийлаштириш орқали ундирилади. 

Юкларни божхона расмийлаштирувидан ўтказганлик учун божхона йиғимлари  ундирилганда божхона юк декларациясига тегишли маълумотлар киритилади.

Божхона йиғими қайси пайтда расмийлаштирув амалга оширилганда ундирилади?

Соат 18.00 дан 9.00 га қадар бўлган вақт ҳамда дам олиш ва байрам кунлари иш вақтидан ташқари вақт ҳисобланади. Товарларни белгиланган жойлардан ташқарида божхона расмийлаштирувидан ўтказишда божхона расмийлаштирувидан бошлаб буюртма-нарядни имзолашгача бўлган вақт ҳисобга олинади.
 
Божхона органлари томонидан белгиланган жойлардан ташқарида ва божхона органларининг белгиланган иш вақтидан ташқари вақтда божхона расмийлаштируви учун бир соатдан кам вақт сарф қилинган тақдирда, божхона йиғими бир ходимнинг тўлиқ бир соат иш куни учун ундирилади.

Манфаатдор шахснинг мурожаатида божхона кўриги, қайта юклаш операцияларини амалга ошириш учун бир нечта ходим ажратиш сўралган бўлса, божхона йиғими божхона пости томонидан ажратилган ҳар бир ходим учун тўланади.

Тартибда назарда тутилган буюртма-наряд тушунчаси нимани англатади?

(Буюртма-наряд – товарлар ва транспорт воситаларини белгиланган жойлардан ташқарида ва (ёки) божхона органларининг иш вақтидан ташқари вақтда божхона расмийлаштирувидан ўтказганлик учун божхона йиғимларини ундиришда божхона органлари томонидан расмийлаштирилган электрон шаклдаги ҳужжат.)

Буюртма-наряд божхона органларининг Ягона автоматлаштирилган ахборот тизимида электрон тарзда расмийлаштирилади. Буюртма-наряд икки қисмдан: «буюртма-наряд» ва «ҳисоб-фактура»дан иборат бўлади.

Буюртма-наряд манфаатдор шахснинг божхона органларига йўллаган мурожаатида келтирилган маълумотлар асосида ахборот тизимида божхона органлари томонидан тўлдирилади. Бунда божхона расмийлаштируви учун ундирилган божхона йиғимлари тўғрисидаги маълумотлар кўрсатилади.

Янги тартиб қачондан кучга киради? 

Қонун эълон қилинганидан уч ой ўтиб, яъни 2021 йил 26 июндан кучга киради.