Францияда умуммиллий локдаун. Қатъий чоралар бир ой давомида амал қилади

Аввалроқ Франциянинг 19 департаментида жорий этилган қатъий локдаун энди бутун мамлакат бўйлаб - 96 департаментда ҳам амал қилади. Бундан ташқари, мамлакатнинг бутун ҳудудида кечқурун еттидан эрталаб олтигача комендантлик соати амал қилиб келганди, барлар, ресторанлар, музей, кинотеатр ва бошқа жамоатчилик жойлари ёпилганди.

Пандемия давридаги учинчи умуммиллий локдаун доирасида барча ҳудудларда соат 19:00дан комендантлик соати жорий қилинади. Ходимлар иложи борича масофадан ишлашга ўтказилади. 5 апрелдан бошлаб камида 3 ҳафтага болалар боғчалари, мактаб ва коллежлар ёпилади. Олий таълим муассасалари талабаларига ҳафтада фақатгина бир кун ўқишга боришга рухсат берилади. 

3 апрелдан бошланадиган карантин доирасида қуйидаги чеклов чоралари киритилмоқда:

• ходимлар яна масофадан ишлашга қайтади;
• энг зарур маҳсулотлар сотиладиган дўконлардан бошқа ҳаммаси ёпилади;
• болалар боғчалари, мактаблар ва коллежлар уч ҳафтага ёпилади. ОТМлар талабалари ҳафтада бир марта дарсга келиши мумкин;
• узрли сабабсиз уйдан 10 километрдан узоқроққа кетиш тақиқланади. Ҳудудлараро сафарлар фақат Пасха байрамлари даврида мумкин.

Франция соғлиқни сақлаш тизими беморларнинг улкан оқимига дуч келмоқда: айни вақтда реанимация бўлимларига ётқизилган беморлар сони 5 минг нафардан ошган. Бу эса мамлакатда 2020 йил ноябрда кузатилган иккинчи тўлқин вақтидаги энг юқори кўрсаткичдан кўпроқни ташкил қилади.

Франция соғлиқни сақлаш вазирлигининг чоршанба кунги маълумотига кўра, бир кунда 59 минг янги касалланиш ҳолати қайд этилган, пандемия даврида вирусдан зарарланганларнинг жами сони 4,6 миллиондан ошиб кетган, 95 минг 495 киши коронавирус қурбони бўлган.

Макрон қандай чоралар ҳақида гапирди?
Чоршанба куни тўғридан тўғри телевизион мурожаатида Макрон мамлакатдаги вазият жуда нозик эканини айтган ва апрель ҳал қилувчи палла бўлиши мумкинлигини қайд этган.

«Агар ҳозир ҳаракатимизни қилмасак, вазият издан чиқиб кетиши мумкин», деган у.

Президентнинг сўзларига кўра, ҳозирда бир томондан эмлаш ҳаракатлари ва иккинчи томондан инфекция тарқалишини тўхтатиш ҳаракатлари ўртасида пойга кечмоқда.

«Вакцинация, вакцинация, вакцинация», дея ёзган твиттерида президент.

Кейинги ҳафтадан мактаблар ёпилиши ҳақида гапираркан, Макрон муҳим соҳаларда ишловчи ходимларнинг фарзандлари машғулотларга қатнашда давом этиши мумкинлиги ҳақида қўшимча қилган.

«Барча ўзаро контактларни чеклаши керак бўлади», деган президент.

Макрон одамлар эҳтиёт чораларига амал қилишнинг самарасини тез орада кўришини таъкидлаб ўтган. Карантин чоралари май ойидан бошлаб ёзгача секин-аста бекор қилиб борилади.

Макроннинг маълум қилишича, 16 апрелдан бошлаб 60 ёшдан 70 ёшгача, 15 майдан эса 50 ёшдан 60 ёшгача бўлган кишилар эмланади. Унинг таъкидлашича, ёз охиригача 18 ёшдан катта барча французлар вакцина олишлари мумкин бўлади. 

Францияда Макрон эълон қилган янги чекловлар танқид қилина бошланди. Жумладан, «Миллий бирлашув» партияси етакчиси Марин Ле Пен «французлар эмлашдаги ҳаяллаши, кибри учун ҳали катта ҳақ тўлашлари»ни айтган.   

Макрон эълон қилган чоралар энди парламентда муҳокама қилинади ва овоз бериш жараёни ўтказилади.