ЖССТ AstraZeneca вакцинаси ва тромбоз ҳосил бўлиши орасида боғлиқлик борлигини тасдиқламади

ЖССТ вакилининг сўзларига кўра, ташкилот экспертлари вакцинанинг фойдаси унинг хатарига нисбатан юқорироқ деб ҳисоблайди. У ЖССТ бу хулосасидан воз кечиши учун ҳозирча асос йўқлигини айтди.

Фото: Reuters

Жаҳон соғлиқни сақлаш ташкилоти (ЖССТ) ҳозирча AstraZeneca вакцинаси ва тромбоз ҳосил бўлиши орасида боғлиқлик борлигини кўрмади. Бу ҳақда ЖССТ вакили Рожериу Пинту де Са Гаспар маълум қилди.

«Ҳозирча вакцина ва тромботик ҳолатлар ёки тромбоцитопения орасида боғлиқлик йўқ»,— деди у.

Унинг сўзларига кўра, ташкилот экспертлари вакцинанинг фойдаси унинг хатарига нисбатан юқорироқ деб ҳисоблайди. Гаспар ЖССТ бу хулосасидан воз кечиши учун ҳозирча асос йўқлигини айтди.

Бир нечта мамлакат эмлашдан кейин тромбоз ҳосил бўлиши ҳолатлари юз берганидан сўнг AstraZeneca вакцинасидан фойдаланишдан воз кечганди. 30 март куни AstraZeneca вакцинаси номи Vaxzevria деб ўзгартирилди.