Чехия президенти касаллик туфайли ногиронлар аравачасида ҳаракатлана бошлади

Оёқлар невропатияси касаллигидан азият чекувчи Чехия президенти Милош Земан ногиронлар аравачасида ҳаракатлана бошлади.

Фото: РБК

“Мен ногиронлар аравачасида ҳаракатланмоқдаман, чунки бу анча қулай. Оёқларим қониқарли аҳволда эмас”, деб айтган Земан Blesk нашрига берган интервьюсида.

Президентнинг таъкидлашича, у шифокорлар тавсия қилган ногиронлар аравачасидан расмий тадбирларда ҳам фойдаланади.

76 ёшли Земан вақти-вақти билан Прагадаги марказий ҳарбий госпиталда даволаниб туради. У, шунингдек, қанд касаллигидан азият чекади.

Земан 2013 йилда Чехия президенти этиб сайланган. 2018 йилда у иккинчи беш йиллик муддатга қайта сайланганди.