Хитой ЯИМ биринчи чоракда рекорд даражада ўсди

Хитой иқтисодиёти биринчи чоракда коронавирус пандемияси бошланиши натижасида таназзулга учраган ўтган йилнинг шу даврига нисбатан 18,3 фоизга ошди. Ушбу натижа 90-йилларнинг бошларида, чораклик ЯИМ статистикаси нашр этила бошлангандан бери энг юқори чораклик ўсиш кўрсаткичи ҳисобланди.

Эълон қилинган маълумотларга кўра, саноат соҳасидаги ўсиш ва СОVID-19 инфекциясининг паст даражаси сабаб 2020 йилнинг охирларида мамлакат иқтисодиёти инқирозгача бўлган даврдан ошиб кетган.

«Эсда тутиш керакки, СОVID-19 эпидемияси ҳали ҳам дунё бўйлаб тарқалмоқда ва халқаро вазият қийин бўлиб, юқори даражадаги ноаниқлик ва беқарорлик сақланиб қолмоқда. Аммо амалдаги тикланиш тенденцияси йил давомида давом этишига аминмиз», деди Хитой Миллий статистика бюроси вакили Лю Айхуа.

Биринчи чоракда ЯИМ ўсишидаги асосий улушни саноат ишлаб чиқариши эгаллаб, унинг улуши ЯИМ ошишида 24,5 фоизни ташкил этган. Саноат ўсишига экспортнинг тикланиши ҳам сабаб бўлган.

Шунингдек, март ойида чакана савдо 34,2 фоизга ўсган.

Ушбу кўрсаткичларни биринчи навбатда Хитой маҳсулотларига, шу жумладан, электроника ва мебелларга бўлган глобал талаб таъминлаган. Бундан ташқари, кенг кўламли инфратузилма лойиҳалари ва кўчмас мулкка инвестициялар иқтисодий фаолликнинг ўсишига ёрдам берган.

Таҳлилчиларнинг прогнозларига кўра, Хитой экспортига бўлган талаб 2021 йил охирига қадар пасайиб кетиши ҳам мумкин.

Аввалроқ, 2020 йилги пандемия чекловларига қарамай, Хитой ўтган йил давомида иқтисодий ўсишга эришган ягона йирик иқтисодиёт бўлгани маълум қилинганди. Брукингс институти ҳисоб-китобларига кўра, тахмин қилинганидан икки йил олдин, яъни 2028 йилга келиб, Хитой дунёнинг энг йирик иқтисодиётига айланиши мумкин.