Сирдарёда учта машина иштирокида содир бўлган «авария»да икки киши ҳалок бўлди

Сирдарё вилоятининг Оқ олтин туманида учта машина иштирокида йўл-транспорт ҳодисаси содир бўлган. Оқибатда икки киши вафот этган. Яна икки киши оғир тан жароҳатлари билан шифохонанинг жонлантириш бўлимига ётқизилган. Бу ҳақда вилот ИИБ ЙҲХБ хабар бермоқда.

Маълум қилинишича, 18 апрелдан 19 апрелга ўтар кечаси соат 00:30 ларда М39 Олмаота-Тошкент-Термиз халқаро автомобиль йўлининг Сирдарё вилояти Оқ олтин тумани ҳудудидан ўтувчи 918 километрида аянчли йўл-транспорт ҳодисаси содир бўлган.

Мазкур йўлда ҳаракатланиб келаётган «Исузи» юк машинаси ортидан келаётган машинага йўл бериш учун йўлнинг ўнг тарафига ўтган ва йўл четида тўхтаб турган «Нексия» машинасини уриб юборган. Натижада, «Нексия» ўзидан бироз олдинда тўхтаб турган «ЗИЛ» юк машинасига бориб урилган.

Оқибатда «Нексия» ичида бўлган икки нафар шахс ҳодиса юз берган жойнинг ўзида ҳалок бўлган. «Нексия»да бўлган яна икки нафар шахс оғир тан жароҳатлари билан туман тиббиёт бирлашмасига қарашли шифохонанинг жонлантириш бўлимига ётқизилган.

Суриштирувда маълум бўлишича, ортидан келаётган машинага йўл бермоқчи бўлиб ўнг тарафга ўтган «Исузи» юк машинаси ҳайдовчиси эҳтиётсизлик билан қалтис ҳаракат қилган.