Тошкент шаҳар аҳолиси сони 2,7 млн кишидан ошди. Уч ойда қарийб 4 минг киши вафот этган

Тошкент шаҳар доимий аҳолиси сони 2021 йил 1 апрел ҳолатига 2,71 млн кишини ташкил этиб, 2020 йилнинг январ-март ойларида 21,8 минг кишига ёки 0,8 фоизга ўсган. 

Тошкент шаҳар Статистика бошқармаси маълумотига кўра, 2021 йил январ-март ойларида туғилганлар 13,3 минг бола, вафот этганлар 3,9 минг кишини ташкил қилди.

Пойтахтнинг ФҲДЁ бўлимларида 2021 йил 1 апрел ҳолатига 4,7 мингта никоҳ, 1,3 мингта ажралишлар рўйхатга олинди.

Аввалроқ, Ўзбекистоннинг доимий аҳолиси қарийб 34,7 миллионга етгани хабар қилинганди.

2021 йил 1 апрел ҳолатига кўра, Ўзбекистоннинг доимий аҳолиси сони 34 695 600 кишини ташкил этди. Аҳоли сони йил бошидан буён 136 700 кишига ёки 0,4 фоизга кўпайган.