Блинкен Афғонистонда ҳокимият тепасига «Толибон» келиши мумкинлигини истисно қилмади 

АҚШ Афғонистондан америкалик ҳарбийлар олиб чиқилгандан кейин у ерда воқеаларнинг ҳар қандай ривожига тайёр туриши керак. Бу ҳақда АҚШ давлат котиби Энтони Блинкен CBS телеканалига берган интервьюсида айтиб ўтди.  

Блинкендан «Вашингтон қўшинлар олиб чиқилгандан кейин Афғонистонда АҚШ томонидан қўллаб-қувватланувчи ҳокимият қулаб, унинг ўрнига «Толибон» келиши мумкин бўлган энг ёмон сценарийга тайёрми?» деб сўралган. «Биз ҳар қандай сценарийга ёки уларнинг бутун бир спектрига тайёр туришимиз лозим. Биз бунга жуда теран қараймиз», деб жавоб қилган АҚШ давлат котиби. 

Блинкен АҚШ ҳарбийлари Афғонистонда 20 йил давомида нима учун қолаётганининг асл мақсадини эслатиб ўтди. «Биз баъзида у ерга биринчи навбатда нима мақсадда жўнаганимизни унутиб қўямиз. Бу 11 сентябрда ҳужум қилган одамларга нисбатан чора кўриш мақсадида қилинган. Ва биз буни уддаладик», деб қўшимча қилган АҚШ давлат котиби.     

Шу билан бирга, Блинкен қўшинларнинг олиб чиқилиши АҚШ Афғонистонни тўлиқ тарк этишини англатмаслигини таъкидлаб ўтди. Унинг айтишича, Афғонистонда АҚШ элчихонаси ўз фаолиятини давом эттиради. «Биз Афғонистонга иқтисодиёт, ривожланиш, инсонпарварлик масалаларида кўрсатаётган кўмагимизнинг барчаси қолади», деб ўз сўзларини якунлаган Блинкен. 

Аввалроқ, апрел ойида АҚШ президенти Жо Байден АҚШда 2001 йил 11 сентябрда содир этилган терактларнинг 20 йиллигигача Афғонистондан бутун қўшин олиб чиқилишига ваъда берганди. АҚШ қўшинларининг Афғонистондан олиб чиқилиши 1 майдан бошланди. Шундан кейин НАТО ҳам Афғонистондан ўз қўшинларини олиб чиқишни бошлаганини эълон қилди.