Олимлар Pfizer вакцинаси коронавируснинг янги штаммларига қарши самарали эканлигини аниқлашди

Pfizer вакцинасининг икки дозаси билан эмлангандан сўнг 75 фоиз беморларда жанубий африкача штаммга нисбатан иммунитет ҳосил бўлган. Британча штамм билан боғлиқ ҳолатларда эса бу кўрсаткич 87-89 фоизга етган.

Фото: REUTERS/Lucy Nicholson

Қатар ва Исроилда ўтказилган тадқиқотлар Pfizer компаниясининг коронавирусга қарши вакцинаси британча ва жанубий африкача штаммларга қарши самарали эканлигини кўрсатди. Бу ҳақда The New York Times хабар бермоқда.

Қатарда ўтказилган тадқиқот натижалари New England Journal of Medicine журналида эълон қилинди. Маълум бўлишича, Pfizer вакцинасининг икки дозаси билан эмлангандан сўнг 75 фоиз беморларда жанубий африкача штаммга нисбатан иммунитет ҳосил бўлган. Британча штамм билан боғлиқ ҳолатларда эса бу кўрсаткич 87-89 фоизга етган.

Яна бир тадқиқот Исроилда ўтказилган бўлиб, унинг натижалари The Lancet журналида чоп этилган.

Бу ерда Pfizer вакцинасининг британча штамм юқтирганларга таъсири ўрганилган. Тадқиқот муаллифларининг хулосасига кўра, вакцина 95 фоиз ҳолатларда британча штаммдан ҳимоя қилади.