Қозондаги мактабда отишма: Ўқувчилар юқори қаватдан ўзини ташлади, қурбонлар сони ўндан ортиқ

11 май куни Россиянинг Қозон шаҳридаги Жавдат Файзи кўчасида жойлашган 175-мактабда отишма рўй берди. 

РИА Новости хабарига кўра, отишмадан кейин портлаш овози ҳам эшитилган. Интернетда тарқалган видеолардан бирида ўқувчиларнинг икки нафари тўртинчи қаватдан ўзини ташлагани акс этган.

Дастлабки хабарларда мактабга икки нафар қуролланган шахс бостириб киргани ва ўқувчиларни ўққа тута бошлагани айтилганди.

Тез орада ҳужум қилган шахс мактаб ҳовлисида қўлга олинди.

Задержание одного из нападавших. Видео: Readovka pic.twitter.com/GsQmBFvTIM

— МБХ медиа (@MBKhMedia) May 11, 2021

Ижтимоий тармоқда унинг ҳибсга олинган ҳолатдаги сурати тарқалди. 

Baza манбаси қўлга олинган шахс ҳақида маълумотлар келтирган — у 19 ёшли Ильназ Галявиев бўлиб, тўрт йил муқаддам ушбу гимназияни тамомлаган, ҳозирда коллежда ўқийди. Бир неча кун муқаддам у телеграм-канал очгани, у ерда ўзини «худо» деб атагани, бугун тонгда «кўп миқдордаги биочиқиндиларни йўқ қилмоқчилиги», кейин ўзини ҳам ўлдириши ҳақида ёзган. Отишмадан кейин Telegram маъмурияти канални ёпиб ташлаган.

Галявиевнинг қуролга рухсатномаси бўлган, депутат Александр Хинштейннинг хабар қилишича, у рухсатномани икки ҳафта олдин, 28 апрель куни олган. У апрель ойида коллеждан ҳайдалгани маълум бўлган.

«Бизнес Online» нашри маълумотига кўра, полиция Туганлик кўчасидаги 10-уйни тинтув қилишга келган. Baza маълумотига кўра, қўлга олинган ўсмир ўзи яшайдиган квартирада бомба борлиги ҳақида айтган. Ҳуқуқ-тартибот органлари ходимлари бу квартирани штурм қилишга қарор қилган, ҳудуддаги бошқа уйларда яшовчилар эвакуация қилинган.

Дастлабки хабарларда яна бир жиноятчи гимназиянинг тўртинчи қаватига жойлашган ҳолда қаршилик кўрсатишда давом этгани, у бир неча ўқувчини гаровга олгани ҳақида айтилганди. Mash, «Интерфакс» ва ТАСС манбалари у махсус амалиёт чоғида йўқ қилингани ҳақида хабар тарқатди.

Аммо воқеа жойида интервью берган Татаристон президенти Рустам Минниханов жиноятчи ёлғиз ҳаракатлангани, унинг «бошқа шериклари аниқланмагани» ҳақида маълум қилди. Иккинчи ҳужум қилувчи ҳақидаги маълумотлар полиция томонидан ҳам рад этилди.

РБК манбаси маълумотига кўра, жиноятчига шерикликда гумон қилиниб, 41 ёшли Рамиль Мухамедшин қўлга олинган.

«Открытые медиа» хабарига кўра, Ильназ Галявиевнинг отаси ҳам терговга чақирилган.

Миннихановнинг матбуот хизмати ҳодиса оқибатида 8 киши — етти ўқувчи ва бир ўқитувчи ҳалок бўлгани, 20 киши жароҳатлангани ҳақида хабар берган.

 ОАВ хабарига кўра эса, отишма оқибатида камида 11 киши ҳалок бўлгани, шунингдек, 32 киши жароҳатлангани айтилган. Мактаб ҳудуди ўраб олинган. Ўқувчилар қўшни бинога кўчирилган. Деразалардан сакраганларнинг икки нафари воқеа жойида ҳалок бўлган.

Қозон шаҳридаги барча мактабларда куннинг иккинчи қисмидаги дарслар бекор қилинган. 12 май Татаристонда мотам куни деб эълон қилинган.