Ботаника боғида номаълум сабабларга кўра ёнғин содир бўлди

Бугун, 16 май куни соат 11:55да Тошкент шаҳар Юнусобод туманида жойлашган Ботаника боғи ҳудудида ёнғин рўй берди.

Фавқулодда вазиятлар вазирлиги ахборотига кўра, боғнинг орқа томонида, очиқ майдонда қуриган хас-хашак ва буталган шох-шаббалар ёнган.

«Қутқарувчиларнинг саъй-ҳаракатлари натижасида ёнғин ўз вақтида ўраб олиниб, боғ ҳудудига ўтишининг олди олинди.

Ёнғиндан жабрланганлар йўқ. Боғнинг ўрмон фондига зарар етмаган.

Ҳолатнинг келиб чиқиш сабаблари аниқланмоқда», – дейилади ФВВ ахборотида.

Фото: Тошкент шаҳар ҳокимлиги ахборот хизмати

Маълумот учун, Тошкент Ботаника боғи – Марказий Осиёдаги энг йирик боғ. 58 гектарлик боғ 1950 йилда ташкил этилган. Боғнинг коллекция ҳисобида 6 мингга яқин ўсимликлар бор.

Аввалроқ Тошкент шаҳар ҳокимлиги пойтахтдаги ўндан ортиқ боғ ва хиёбонлар қаторида Ботаника боғи ҳам реконструкция қилинишини маълум қилганди. Kun.uz ҳокимлик таклиф этаётган реконструкция лойиҳасини эълон қилганди.