Пентагон Афғонистондан АҚШ қўшинларининг олиб чиқиб кетилиши бўйича ҳисобот берди

Афғонистондан АҚШ қўшинларини олиб чиқиб кетиш жараёни 13–20 фоизга якунланди. Бу ҳақда АҚШ марказий қўмондонлиги (СЕНТКОМ) маълум қилди.

«Президентнинг қўшинларни олиб чиқиб кетиш тўғрисидаги қароридан сўнг Пентагон 115та C-17 ҳарбий-транспорт самолётида юкларни олиб чиқди, 5 минг бирликдан ортиқ қурилма йўқ қилиш учун мудофаа вазирлиги агентлигига берилди. СЕНТКОМ қўшинларни олиб чиқиб кетиш жараёни якунланишини 13–20 фоиз деб баҳолайди», дейилади қўмондонлик хабарида.

14 апрел куни АҚШ президенти Жо Байден Афғонистондаги операцияни якунлашга қарор қилгани ҳақида айтди. Америка қўшинлари Афғонистондан 11 сентябргача олиб чиқиб кетилиши кутилмоқда.

2010–2013 йилларда Афғонистонда 150 мингдан ортиқ Ғарб ҳарбий кучлари жойлашганди. АҚШ ва НАТОнинг асосий жанговар қисмлари 2014 йилда мамлакатдан олиб чиқиб кетилган.