Пандемия бошланганидан буён Чехияда тўртинчи соғлиқни сақлаш вазири истеъфога чиқди

Чехия соғлиқни сақлаш вазири Петр Аренбергер ўз лавозимини тарк этмоқда. У пандемия бошланганидан буён истеъфога чиқаётган тўртинчи соғлиқни сақлаш вазиридир, деб ёзади Associated Press (AP).

Қайд этилишича, 7 апрел куни вазирликка тайинланган Аренбергер Брюсселдаги ЕИ саммитида қатнашаётган бош вазир Андрей Бабишга қўнғироқ қилган ва истеъфога чиққанини айтган.

Вазирнинг истеъфога чиқишига унинг солиқ ҳисоботида қоидабузарликларга йўл қўйганликда айбланиши сабаб бўлган.

Бабишнинг сўзларига кўра, у Адам Войтехни соғлиқни сақлаш вазирлигига номзод сифатида кўрмоқда. Войтех Чехия коронавирус эпидемияси билан тўқнаш келган вақтда соғлиқни сақлаш вазири бўлган.

21 сентябрда унинг ўрнини эгаллаган эпидемиолог Роман Примула эса карантин вақтида ёпилган ресторанга борганидан сўнг истеъфога чиқишга мажбур бўлган. 

29 октябрда Ян Блатни ушбу лавозимга тайинланди. Аммо у эпидемияга қарши чоралар кўришда Андрей Бабиш билан қарашлари тўғри келмагани учун апрел бошларида истеъфога чиқарилди.