Қорақалпоғистонда 2021 йилда 700 миллиард сўмлик 180 гектар иссиқхона ташкил этилади

«Қорақалпоқ агро» эркин иқтисодий зонаси ташкил этилади, қишлоқ хўжалигида фойдаланилмаётган 91 720 гектар суғориладиган ер майдонлари фойдаланишга киритилади.

Бу ҳақда AОКAда ўтказилган брифингда Қишлоқ хўжалиги вазирлиги ахборот хизмати раҳбари Нигора Хўжаева маълум қилди.

Қорақалпоғистон Республикасида 2021 йилда иссиқхона йўналишида қиймати 700 млрд сўмлик 47 та лойиҳада 180 гектар иссиқхоналар ташкил этиш белгиланган. Эркин иқтисодий зонага 12 та тумандан 875,4 гектар ер майдонлари бириктирилади.

Қорақалпоғистонда 3,3 минг гектар боғ ва 2 минг гектар узумзор мавжуд, ушбу майдонлардан 30 минг тонна мева ва 10,5 минг тонна узум маҳсулотлари етиштирилмоқда. 

Ҳудудга етказиб берилган 10 та бурғулаш техникаси ёрдамида ўнлаб йиллар давомида ҳеч нарса етиштирилмаган кенг ер майдонларини ўзлаштириш учун қудуқлар қазилмоқда.