Тихановская Чехияда Беларусь раҳбари сифатида қабул қилинди

Беларусь президентлигига собиқ номзод Светлана Тихановская Чехия парламенти сенатида давлат раҳбари сифатида қабул қилинади, деди Чехия юқори палатаси спикери Милош Вистрчил.

«Беларусда 2020 йил августда ўтказилган президент сайлови эркинликсиз, адолатсиз ва ноқонуний бўлди. Сенат ва мен Светлана Тихановскаяни Беларусь президенти деб ҳисоблаймиз», — деди у.

Қайд этилишича, Тихановская 10 июнгача Чехияда бўлиб туриши кўзда тутилган.

Тихановская 8 июн куни Чехия президенти Милош Земан ва бош вазири Андрей Бабиш билан учрашув ўтказади. Бундан ташқари, у мамлакат ташқи ишлар вазири Якуб Кулганек билан ҳам учрашиши режалаштирилган.

Шунингдек, Тихановская 9 июн куни парламент юқори палатаси аъзолари олдида чиқиш қилади.

Аввалроқ Евроиттифоқ мамлакатлари ташқи ишлар вазирлари уни 21 июнда бўлиб ўтадиган ЕИ кенгаши йиғилишига таклиф қилганди.