Тошкентда мини-футбол бўйича ДХХ раиси кубоги ўтказилади

ДХХ матбуот хизматининг хабар беришича Тошкент шаҳрида мини-футбол бўйича ДХХ раиси кубоги бўлиб ўтади. Унда вилоят босқичларида ғолибликни қўлга киритган энг кучли 14 та жамоа қатнашади.

Жорий йил апрель ойидан бошлаб, республика бўйлаб мини-футбол бўйича ДХХнинг Қорақалпоғистон Республикаси, вилоятлар ҳамда Тошкент шаҳар бошқармалари бошлиқлари кубоги ўтказилди.

Унда 18-30 ёш оралиғидаги ёшлардан иборат 7779 та жамоа иштирок этди. Вилоят босқичида ғолибликни қўлга киритган энг кучли 14 та жамоа 12-15 июнь кунлари Тошкент шаҳридаги “Миллий” стадионида ДХХ Раиси кубоги учун ўзаро куч синашади.

Биринчи ўринни эгаллаган жамоага улар истиқомат қиладиган туманда мини-футбол майдони, иккинчи ва учинчи ўринларни қўлга киритган жамоаларга эса улар яшайдиган туманларда “Workout” майдончалари қуриб берилади.

Шунингдек, “Энг яхши ўйинчи”, “Энг яхши тўпурар”, “Энг яхши дарвозабон” ва “Энг яхши мураббий” номинациялари бўйича ғолиблар ҳам аниқланади.