Шри-Ланка ҳукумати мамлакат соҳилида ёнғин чиққан кема эгасидан 40 млн доллар талаб қилди

 Шри-Ланка ҳукумати мамлакат соҳилида 20 май куни ёнғин чиққан ва икки ҳафтадан сўнг ўчирилган кема операторидан 40 млн доллар компенсация ундирмоқчи. Бу ҳақда Associated Press агентлиги хабар берди.

Шри-Ланка бош прокурори X-Press Feeders компанияси юристларига бу борадаги ҳужжатларни жўнатган. Ҳукумат ёнғин оқибатидаги экологик зарарни баҳолаш ишларини давом эттирмоқда, сўралган пул эса қутқарув ишлари харажатини қоплаши лозим.

 Сингапурда рўйхатдан ўтган X-Press Pearl кемасида Коломбо шаҳридан 18 километр нарида ёнғин чиққанди. Натижада юзлаб тонна нефт денгизга оққан.

Кемада заҳарли моддалар, жумладан, 25 тонна азот кислотаси бўлган.