АҚШда Johnson & Johnson’нинг 60 миллион доза вакцинаси йўқ қилиб юборилади

АҚШнинг озиқ-овқат маҳсулотлари ва дори-дармонлар сифати бўйича санитар назорат бошқармаси (FDA) Johnson & Johnson компанияси коронавирусга қарши ўз вакцинасининг 60 млн дозасини йўқ қилиши кераклигини айтди. Бунга Балтимордаги заводда вакцина ишлаб чиқаришда йўл қўйилган хато сабаб ҳисобланади.

Фото: Reuters

FDA’нинг таъкидлашича, вакцинанинг бир нечта партияси ифлослангани сабабли қўллаш учун яроқсиз бўлиши мумкин. Бошқарма кўрсатмасига кўра, Johnson & Johnson вакцинасини ишлаб чиқарувчи Emergent BioSolutions компанияси коронавирусга қарши воситани ишлаб чиқаришни тўхтатган. Чунки завод ходимлари унга бошқа бир восита – AstraZeneca вакцинаси компонентларини қўшиб юборишган.

Johnson & Johnson вакцинаси хавфсиз эканига шубҳа пайдо бўлиши ва шу сабабли унга АҚШда талаб пасайгани бир марта киритилувчи ушбу воситанинг оммавий қўлланиш суръатини пасайтирди. АҚШда ишлаб чиқарилган 21 млн доза вакцинадан ярми қўлланмай қолиб кетган.

Айни вақтда FDA Балтимордаги заводда ишлаб чиқарилган AstraZeneca вакцинасининг миллионлаб дозасини текширмоқда. Ушбу вакцинадан 10 млн дозаси қўллаш учун маъқулланган.

Аввалроқ АҚШ мутасадди идоралари Johnson & Johnson вакцинаси билан эмлашни тўхтатишни тавсия этган. Шундан кейин Европанинг бир қатор давлатларида ҳам ушбу тавсияга амал қилинган.

Johnson & Johnson вакцинаси кучсизлантирилган аденовирус негизида ишлаб чиқилган. У иккинчи дозанинг киритилишини талаб қилмайди ва музлаткичда бир неча ой давомида сақланиши мумкин.