Божхона қоидалари: Заргарлик буюмларини олиб кириш ва олиб чиқиш тартиби қандай?

Хорижга чиқаётган ва кираётган аксар фуқароларни заргарлик буюмларига доир бир неча савол қийнайди: Қанча миқдордаги қимматбаҳо металл ва тошлардан заргарлик буюмларини олиб кириш ва олиб чиқиш мумкин? Бунда белгиланган меъёр қанча ва ҳакозо.

Давлат божхона қўмитаси Божхона назоратини ташкил этиш бошқармаси катта инспектори Меҳрож Ваҳобов шу каби саволларга ойдинлик киритади.

Ўзбекистонга қанча вазндаги заргарлик буюмини ўз эҳтиёжи учун божсиз олиб кирса бўлади?

Қимматбаҳо тошлардан ва металлардан ясалган заргарлик буюмларини чегара божхона постлари орқали Ўзбекистонга олиб кириш ва ундан олиб чиқиш бевосита амалдаги қарорлар билан белгилаб берилган меъёрлар асосида тартибга солинади.

Хусусан, жисмоний шахслар республика ҳудудига ўз эҳтиёжлари учун 65 граммгача бўлган заргарлик буюмларини олиб киришлари мумкин. Бунда олиб кираётган йўловчи заргарлик буюмларини оғзаки декларациялаш орқали яшил йўлакдан ҳаракатланиши мумкин.

65 граммдан кўп бўлган заргарлик буюмларини олиб кириш эса, бевосита божхона тўловларини тўлаган ҳолда амалга оширилади. Божхона тўловлари миқдори қонунчиликда қайд қилинган асосда белгиланади. Тўловлар миқдори олиб кирилаётган заргарлик буюмлари тури ва вазнига кўра ўзгаради.

65 граммдан ошган заргарлик буюмлари учун белгиланган тартибда бож тўланади

Мисол учун, жисмоний шахс томонидан Ўзбекистон ҳудудига оғирлиги 100 гр бўлган заргарлик буюми олиб кирилаётган бўлса, 100 граммнинг 65 граммига имтиёз қўлланилади, яъни ҳеч қандай божхона тўлови ундирилмайди, қолган 35 грамм заргарлик буюми учун меъёрий ҳужжатларда белгиланган тартибда божхона тўлови ундирилади.

Бунда бож миқдори олиб кирилаётган заргарлик буюмининг қандай қийматдаги металлдан ясалгани, ундаги тош қиймати инобатга олинган ҳолда белгиланади. Тижорат мақсадларида заргарлик буюмларини олиб кириш бевосита божхона юк декларациясини расмийлаштирган ҳолда амалга оширилади.

Ўзбекистондан қанча миқдордаги заргарлик буюмларини олиб чиқиш мумкин?

Ўзбекистон резидентлари ва норезидентлари бўлган жисмоний шахслар қиймати 5 минг АҚШ долларидан ортиқ бўлган заргарлик буюмларини божхона юк декларациясида кўрсатган ҳолда олиб чиқишига рухсат берилган.

Бунда заргарлик буюмларини олиб чиқиб кетаётган жисмоний шахс чегара-божхона постларидаги қизил йўлак орқали ҳаракатланади.

Ўзи билан қиймати 5 минг АҚШ долларидан кам бўлган заргарлик буюмларини олиб чиқиб кетаётган жисмоний шахслар йўловчи божхона декларациясида кўрсатмаган ҳолда, яшил йўлакдан ҳаракатланиб олиб чиқишлари мумкин.

Заргарлик буюмларини почтадан юбориш ёки почта орқали қабул қилиб олиш мумкинми?

Қимматбаҳо металл ва тошлардан ясалган заргарлик буюмларини курьерлик хизматлари ва почта жўнатмалари орқали Ўзбекистонга олиб кириш ва ундан олиб чиқиш тақиқланади.

Тавсия ўрнида

Заргарлик буюмларини олиб чиқаётган фуқаролар ташриф буюрадиган мамлакатларида заргарлик буюмларини божсиз олиб кириш меъёрлари, вазнига доир маълумотларни билиб олиши мақсадга мувофиқ бўлади.