Видео: Бектемир Мелиқўзиев нокаутга учради

Профессионал бокснинг супер ўрта (-76,2) вазн тоифасида рингга кўтарилаётган Бектемир Мелиқўзиев (7-1, 6 КО) навбатдаги жангини америкалик Габриэль Росадога (26-13-1, 15 КО) қарши ўтказди.

АҚШ вақти билан 19 июнь оқшомида Техас штатидаги Эл-Пасо шаҳрида бўлиб ўтган жанг 3 раунддаёқ тугади. 12 раундга мўлжалланган жангнинг 1-раундида ўзбекистонлик боксчи тўлиқ устунлик қилди ва рақибини нокдаун ҳолатига ҳам туширди.

У кейинги раундларда ҳам ҳужумкорликда давом этди, аммо 3-раундда навбатдаги ҳужуми вақтида кучли зарбани ўтказиб юбориб, рингга қулади.

GABE ROSADO WITH THE KO OUT OF NOWHERE 🤯 pic.twitter.com/mOEAP2SChG

— DAZN Boxing (@DAZNBoxing) June 19, 2021

Тажрибали Росадо бу ғалаба орқали Бектемир Мелиқўзиевнинг WBA Continental ва WBO International камарларини ўзиники қилди.

Бектемир Мелиқўзиев учун бу профессионал боксдаги илк мағлубият бўлди. У шу кунга қадар ўтказган 7та жангининг барчасида (шундан 6тасида нокаут билан) ғалаба қозонганди.