Майамида 12 қаватли бино қулади. 159 киши бедарак кетган

Майами-Дейд округи мэри Даниэлла Левин Кава жума куни тонгида берган маълумотга кўра, бинонинг бутун қолган қисмида бўлган 120 киши қутқарилган. «Аммо афсуски, йўқолган деб ҳисобланаётганлар сони 159 нафарга етган», деган у. Аввалроқ 100га яқин киши бедарак кетгани айтилаётганди.

Ҳозирча ҳодиса рўй берган вақтда бино ичида қанча одам бўлгани ҳақида аниқ маълумот йўқ.

JUST IN: 7News has obtained surveillance video of the moment the Champlain Towers South Condo collapsed in Surfside early this morning.

According to a fire official, 35 people were pulled from the collapsed building. Search and rescue efforts ongoing. https://t.co/Ac7KgnJOSO pic.twitter.com/oeczbumRG9

— WSVN 7 News (@wsvn) June 24, 2021

Қутқариб олинганларнинг кўпчилигига тиббий ёрдам кўрсатишга тўғри келган, уларнинг икки нафари шифохонага жойлаштирилган. Яна ўнлаб кишилар вайроналар остида қолиб кетгани ёки қуйидаги қаватларда ёпилиб қолгани тахмин қилинмоқда. Қутқарувчилар кўтарма кранлар ёрдамида бинода яшовчи одамлар олдига етиб бориб, уларни эвакуация қилишга уринмоқда.

Пайшанба куни тонгда АҚШ фуқароси Женни Ургеллес қўрқинчли янгиликдан хабар топди: унинг ота-онаси яшаган уй қулаб тушган. У дарҳол уйга қўнғироқ қилган, аммо фақат автомат жавобини эшитган. «Мен ҳали ҳам умидимни йўқотганим йўқ, мен нималар бўлганини билишни жуда ҳам истайман», дея ҳикоя қилган у маҳаллий телеканаллардан бирига.

Президент Жо Байден Флоридада фавқулодда ҳолат жорий этилишини маъқуллаган: бу эса фавқулодда вазиятлар бўйича федерал агентлик маҳаллий хизматларга ёрдам кўрсатишига имкон беради.

Майами-Бичдан шимолда жойлашган Серфсайд туманида олинган суратларда турар жой биноси қулаши оқибатлари акс этган. «Бинонинг орт қисми, катта эҳтимол билан, учдан бир қисми ёки янада кўпроғи тўлиқ қулаб тушган», деган матбуот анжуманида Серфсайд мэри Чарльз Беркетт.

Хабар қилинишича, бинодаги ўпирилиш маҳаллий вақт билан 24 июнь куни тунги соат 02:00дан ўтганда рўй берган (Тошкент вақти билан соат 12:00).

Кеч киргач қутқарувчилар эхолокаторлар ва махсус ўргатилган итлар ёрдамида вайроналар орасидаги одамларни топишга киришган. Жабрланувчилар жойлашган ҳудудларга етиб бориш учун қутқарувчилар жамоаси ер ости автотураргоҳидан туннель очишга уринишган.

Майами-Дейд ўт ўчириш хизмати хабар беришича, воқеа жойига 80та автомобил йўлланган. Қутқарув амалиётида полициячилар ҳам иштирок этмоқда.

«Воқеа жойида ўт ўчирувчилар ва итлар билан қидирув жамоаси ишламоқда. Улар қутқарув-қидирув амалиёти ўтказишмоқда ва бу ишни давом эттиришади. Улар таслим бўлишмайди. Улар тун бўйи тўхтамасдан ишлашади», деган журналистларга Майами-Дейд округи полицияси директори Фредди Рамирес.

Қидирув хизмати хабар беришича, вайроналар остидан турли овозлар келмоқда. Аммо қутқарувчилар устига бетон қолдиқлари босиб тушиши хавфи ҳам бор.

«Бу кўп вақт ва диққат талаб қилувчи жараён. Биз конструкцияларни тешиб ўтиш учун ҳаракат бошлаганимизда, устимизга қолдиқлар ёғилади», дейди Майами-Дейд округи ўт ўчириш хизмати бошлиғи ёрдамчиси Рэй Джадалла.

 Давом этаётган ёмғир ва шамоллар эса қутқарувчиларнинг шусиз ҳам мураккаб ишини қийинлаштирмоқда.

Маҳаллий расмийлар бедарак кетганларнинг қариндошларидан ДНК намуналарини ола бошлаган - харобалар остидаги қолдиқлар шахсини аниқлаштириш учун. Харобалар остида қолиб кетганларнинг қариндошлари ва яқинлари қулаб тушган бинодан бир неча квартал нарида навбатдаги маълумотларни кутиб яшашмоқда.

Маҳаллий аҳоли вакилларидан бири Николас Фернандес CBS каналига телефон қўнғироқларига жавоб олмагач, ота-онасининг олдига йўл олгани ҳақида гапириб берган. «Афтидан, биз уларни йўқотдик. Пессимист бўлишни истамасдим, аммо биз тўхтовсиз қўнғироқ қилмоқдамиз, аммо афсуски, натижасиз», дейди у.

«Бомба портлашига ўхшарди»
Бинода ўпирилиш бошланганида Барри Коэн ётоқда бўлган. «Кучли момақалдироқ бўляпти деб ўйлагандим, рафиқам билан балконга чиқдик. Биз кўрган ҳолат бомба портлашини эслатарди - ҳаммаёқ чанг-тўзон ва тутунга тўлганди», дейди у BBC мухбири билан суҳбатда.

Полициячи ундан ва рафиқасидан квартирада қолишни сўраган. Аммо Коэннинг эслашича, шундан кейин бино улкан портлашдан титрагандай силкина бошлаган.

«Биз эшикни очганимизда, ҳеч қандай бино қолмаганди, фақат бир уюм қолдиқ бор эди. Биз гаражга тушдик ва трубадан сув оқаётганини кўрдик. Тўпланган сув тизза бўйи чиққанди, биз яхшиси бу ердан тезроқ кетиш керак деб ўйладик», дея эслайди у. Барри Коэн фавқулодда хизматларга ёрдам сўраб мурожаат қилган: у ва рафиқасини бино тўлиқ қулаб тушишидан олдин қутқариб олишган.

Америкалик журналистлар вайроналар остидан ўн ёшли бола чиқариб олингани ҳақида ёзмоқда.

MIRACLE RESCUE: Firefighters pull boy from rubble alive after multi-story building partially collapses near Miami Beach.

A huge search and rescue effort is ongoing. https://t.co/eOl265Wngw pic.twitter.com/A62e5ka58v

— ABC News (@ABC) June 24, 2021

Воқеа вақтида укаси билан итини сайр қилдириб юрган йигит CBS телеканалининг Майамидаги мухбири билан суҳбатда бино қандай қулаётганини эшитгани ҳақида айтиб берган. «Биз жуда кучли гумбурлашни эшитдик, ўйлагандикки, бу мотоцикл овози. Ортга ўгирилганимизда кўрдикки, биз томон чанг булути яқинлашмоқда. Биз нима бўлаётганини тушунмадик. Юзимизни кўйлак билан тўсдик ва шу томонга чопдик. Йўлимизда қўриқчи пайдо бўлди, ундан нима бўлганини сўрадик. У эса бино қулаб тушганини айтди», деган у.

Гувоҳлардан яна бири CNN’га бу 11 сентябрни эслатганини айтган - у 2001 йилги теракт вақтида Нью-Йоркдаги эгизак биноларнинг қулашини назарда тутган.

Полиция қулаган бино манзилини маълум қилган — 8777 Коллинз-авеню манзилидаги Champlain Towers биноси. Қирғоқ яқинида жойлашган бу бинода юздан ортиқ квартиралар бўлган.

Қурилганига 40 йил бўлган бинонинг қулашига нима сабаб бўлгани ҳозирча маълум эмас. Айрим маълумотларга кўра, бино жойлашган ер майдони 1990-йилларда чўккан бўлиши мумкин.