Ўзбекистоннинг энг новча мелисаси: «Машҳурлигим менга завқ ва масъулият бағишлайди»

Kun.uz мухбири Фарғонада кўпчилик танийдиган, узун бўйи сабабли бошқа ходимлардан яққол ажралиб турадиган машҳур Шерзод Сирожиддинов билан суҳбатлашиб, унинг бир кунлик ҳаёти ҳақида лавҳа тайёрлади.

Шерзод Сирожиддинов 1981 йилда Фарғона вилояти, Ўзбекистон тумани, Ўқчи қишлоғи, Бозорбоши маҳалласида туғилган. Оилада 4 ўғил бўлиб, у тўнғич фарзанд. 3 нафар укаси бор. Укаларининг ҳам қад-қомати худди уникидек новча.

Бўлажак милиционер 1998 йилда Андижон бокс мактабига бориб, спорт билан шуғулланади. 1999 йилда қишлоғига қайтиб, деҳқончилик қила бошлайди.

Ўша пайтда Фарғона вилояти ИИБ бошлиғи, ҳозирда президент маслаҳатчиси бўлган генерал-лейтенант Турсунхон Худойберганов 2006 йилда Шерзод Сирожиддиновни Ўзбекистон тумани ИИБ биноси ёнида тасодифан учратиб қолади. У баланд бўйи сабабли мулозимнинг эътиборига тушади.

Шундан буён Шерзод Сирожиддинов ички ишлар органлари ходимлари сафида хизмат қилиб келмоқда. Аввалига у 6 ой муддат Қўқон шаҳрида ЙПХда фаолият юритади. Ҳозирда у Фарғона вилояти ИИБ ППХ 1-батальон 3-отрядда сафдор бўлиб ишлайди.

У 2008 йилда оила қурган, 2011 йилда ўғли Турсунхон Шоҳиддинов туғилган.

Шерзод Сирожиддинов ички ишлар идоралари сафига қандай келиб қолгани ҳақида ҳикоя қилиб берди.

«2006 йилда Турсунхон Худойберганов мени тасодифан учратиб қолгач, ички ишлар идоралари сафига қабул қилиндим — 1 соатда хизмат формасини кийганман.

Форма кийганимдан кейин Қўқон шаҳрида ЙПХда фаолият бошладим. Бир муддатдан кейин Фарғона шаҳрида малака оширдим. 2006 йилдан буён ППХда ишлаб келмоқдаман».

Шерзод Сирожиддинов узун бўйнинг ижобий ва салбий томонлари ҳақида ҳам гапирди.

«Бўйим 2 метр 20 см, вазним эса 150 кило тош босади. Бўйимнинг узунлиги ўзим учун кўп ҳолларда яхшиликка деб биламан. Баланд жойларга бемалол нарсамни қўя оламан. Куйиб қолган лампочкаларни бемалол алмаштираман.

Ноқулай томони эса кўп жойларга сиғмаслигимда. Кўпинча бошимни эшик кесакисига уриб оламан. Доимий рефлекс бўлиб қолгани — бирор жойга киришда доим энкайиб киришга тўғри келади. Унча-мунча машиналарга сиғмайман. Унинг ичида аранг ўтираман», дейди у.

У устки кийимлари ва пойабзалини фақат буюртма бўйича тикиб беришлари ва эл орасида бўлган ҳурмати ҳақида гапирди.

«Хизмат кийимидан ташқари, фуқаролик кийимларимни ҳам «заказ» қиламан. Менинг ўлчамимни бозорларда топиб бўлмайди. Бозордаги кийимлар сиғмайди», дейди у.

Шерзод Сирожиддиновнинг севимли машғулоти бокс. У билан биргаликда бокс мактабига бордик. Ходим иш билан биргаликда бокс билан мунтазам равишда шуғулланиб турар экан. Унинг ўғли ҳам бокс билан шуғулланади. Ягона фарзанди ҳам отаси каби ички ишлар ходими бўлишини хоҳлайди.

«2008 йилда уйланганман. Ўғлим бор. Бахтли ҳаёт кечириб келяпмиз. 2011 йилда туғилган ўғлим спортнинг бокс тури бўйича мунтазам равишда шуғулланиб келмоқда. Ўғлим келажакда ички ишлар ходими бўлади.

Бокс билан шуғулланишни Андижон олимпия захиралари спорт коллежида бошлаганман. У пайтда кичик жанглар ўтказганман. Фарғонада 15 йилдан буён Ҳамид ака Турсунов қўл остида шуғулланиб келяпман.

Оилада тўнғич ўғилман. Мендан кейин 3 укам бор. Улар ҳам бўйдор. Менинг елкамдан келишади. Дадам ҳам бўйдор бўлган. Оилада энг бўйи баланди ўзимман.

Фарғонанинг Қиргули мавзесида фаолият олиб бораман. Асосий ишимиз жамоат тартиби ва фуқаролар хавфсизлигини таъминлашдан иборат.  

Ноодатий бўйим сабаб кўчада юрганимда ҳамма мени танийди. Хизмат фаолиятим бўйича қизиқ воқеалар кўп бўлади. Ҳуқуқбузарлик қилган фуқаро қочадиган бўлса, уни дарҳол ушлаб оламан. Бошқа ходимлар ҳам мени ҳурмат қилишади. Мени жуда кўпчилик танийди. Бу эса менга завқ ва масъулият бағишлайди», дейди қаҳрамонимиз.

Сарвар Зияев, Kun.uz мухбири,
Монтаж устаси: Жаҳонгир Алибоев.