“Болаларга шароит яратиб, оилавий меҳрибонлик уйини ташкил қилмоқчиман” — 10 нафар қизни асраб олган ватандош

Оила бошлиғи Рустам Эгамуродов – нафақада бўлишига қарамай, бир неча хил касб орқасидан оила тебратади. У ота-онасидан айрилган чин етим болаларни ўз қарамоғига олган. Ҳозирги кунда оилада 10 нафар бола тарбия топяпти.

“Ҳозирча 10 нафар болани уйимда ўз тарбиямга олганман. Билмадим, болаларга бўлган меҳрим Аллоҳдан бўлса керак. Ўғлим лейтенант бўлгандан кейин пенсияга чиқдим. Кичкина ўғлимни ўқитаман, дегандим, афсуски, ўспиринлигида вафот этди. Шундан сўнг аёлим қаттиқ тушкунликка тушди, уйимиз ҳувуллаб қолгандек бўлди. Биласизми, бу кунларни душманимга ҳам раво кўрмайман.

Кейин бола асраб олсак-чи, деган фикр келди. Аёлим билан маслаҳат қилдик, фақат қиз, ўғил бола эмас, деган қарорга келдик. Чунки ўғил бола барибир иккимизга ҳам ўз фарзандимизни эслатади, унинг ҳар бир ҳаракатини ўғлимга қиёслаб кўнглимиз эзилиши мумкин. Шу сабаб 2012 йилдан бошлаб ота-онаси йўқ қизларни асраб ола бошладик.

Биринчи қизим Гулноза шу тарзда оиламга кириб келди. Уни асраб олиш тарихи ҳам ўзгача. Болалар уйига борганимда бир қиз ҳаммадан айри бўлиб бир чеккада ўтирарди, менга тавсия этишган қизалоқни олиб келишганда: “Йўқ, ҳув четда ўтирган қизалоқни беринглар”, дедим. Ҳозиргача шу қизим ўз ёшида оғир атлетика ва бокс бўйича икки карра вилоят чемпиони бўлди.

Кўп одамлар: “Сенга нима керак бош оғриғи”, деб айтади. Уларга эса менинг айтадиган гапим йўқ, шарт ортимга буриламан-кетаман. Ақли бор одам шу гапни айтиши мумкинми?” – дея сўзлайди қаҳрамонимиз.

Рустам Эгамуродов суҳбат давомида ўзининг кундалик иши, катта бир оиланинг рўзғор ташвишлари ҳақида ҳам ҳикоя қилди.

“Юқорида ҳам айтгандим, катта ўғлим бор, унинг оиласи, невараларим бор. Ўғлим ҳам укалари учун ёрдам бериб туради.

Бундан ташқари, уйда деҳқончилик қиламиз, шу ердан чиққан маҳсулотлар билан қишлик ғамлаймиз. Оғилда озроқ қўй боқамиз, гўшт ҳам ўзимиздан чиқади. Давлат томонидан эса ёрдам ҳозирча йўқ, чунки биз Тошкент вилоятида бола асраб олиб улғайтирадиган биринчи оиламиз.

Оилавий болалар уйи яратиш тўғрисида 2007 йилда қарор чиққан. Оила барибир яхши-да, бир томондан меҳрибонлик уйларида давлат миллиардлаб маблағ сарф этади, иккинчи томондан, унинг тарбияси, шахс сифатида улғайиши оилада яхшироқ кечади. Агар статистикага қаралса, “зона”дагиларнинг ярмидан кўпи – меҳрибонлик уйларидан чиққанлар...

Агар бола оилада тарбия қилинса-чи, албатта назоратда бўлади, унинг қилар иши меҳрибонлик уйларида бўлгани каби уйқудан туриш, мактабдан қайтиб тайёр тушликни еб, яна дам олиш ва яна кечки овқатни ейиш эмас. Қолаверса, у ерда тарбиячилар фақат ойликни кутиб яшайди, болани назорат қилиш, оилавий тарбия бериш қизиқмас. Бу болаларга оддий кўз билан эмас, қалб кўзи билан назар солиш керак.

Қачондир, пешонага битилган куни бу дунёдан кетамиз, мен бу уй-жойларни ўзим билан олиб кетолмайман-ку. Ниятим шуки, болаларимга шу уй ўрнида барчаларига имконият яратиб бериш, оилавий болалар уйи қуриш.

Бунинг учун проект қилдирилган, тайёр. Қани энди шу атрофда ижтимоий коттежлар бўлса, чунки бошқа оилалар ҳам бор. 8 йилдан бери оилавий болалар уйи учун ҳаракат қиламан”.

Оилавий меҳрибонлик уйини қуриш нияти

Рустам ака оилавий меҳрибонлик уйи қуриб, яна кўплаб болаларни асраб олмоқчи эканини айтиб ўтди. Бу хайрли ишни қонунийлаштириш учун бир неча йиллардан бери ҳаракат қиляпти. Лекин ҳозирча бу ишлар якунига етмаган. Қаҳрамонимиз бу ишга масъул раҳбарлардан эътибор қилишини сўраб қолди.

“Оилавий меҳрибонлик уйлари болаларга ҳақиқий тарбия ва ҳаёт мактабини ўтаб беради. Уларни ҳаётга ва келажакка тарбиялайди. Шунингдек , давлат бюджети анчагина иқтисод қилинади”, дейди Рустам ака.

Шу ўринда, Рустам Эгамуродов хонадонига ёрдам беришни истаган ватандошларимизга қуйидаги маълумотларни келтириб ўтамиз:

UzCard: 8600 0604 2142 0911

Humo: 9860 1201 6942 8568

Tel: +99897 333 46 98

Раҳматилло Исроилов тайёрлади.