Францияда коронавирус сабабли комендантлик соати қайтадан жорий этилиши мумкин

Франция ҳукумати яқин вақт ичида мамлакатнинг айрим регионларида комендантлик соати қайтадан жорий этилиши мумкинлигини истисно қилмаяпти. Бу ҳақда Франция ташқи ишлар вазирлиги давлат котиби Клеман Бон BFM телеканали эфирида маълум қилди.

«Бўлиши мумкин», — деди у бу ҳақда берилган саволга жавобан.

Унинг сўзларига кўра, мамлакат президенти Эмманюэл Макрон 12 июл кунги телевизион мурожаатида регионлар префектлари карантин чекловларини жорий этиш ҳуқуқига эгалигини айтган.

«Чоралар вазиятнинг оғирлигига мувофиқ ҳолда қабул қилиниши лозим», — деб таъкидлади Бон.

18 июл куни Францияда сутка давомида 12 мингдан ортиқ коронавирус юқтириш ҳолатлари қайд этилган. Экспертларнинг фикрича, бу мамлакатда янги эпидемия авж олганидан дарак беради.

Охирги маълумотларга кўра, мамлакатда коронавирус юқтириш билан боғлиқ ҳолатлар сони 5,8 миллиондан ошган, 111 мингдан зиёд бемор вафот этган. Республикада 36 миллиондан кўпроқ киши коронавирусга қарши вакцинанинг бир дозасини олган.