Huawei компанияси Volkswagen таъминотчиси билан ҳамкорлик қилади

Huawei компанияси Volkswagen Group (кейинги ўринларда – Volkswagen) концерни таъминотчи ҳамкори билан лицензиявий шартномасини имзолади. Ҳужжат симсиз алоқа модуллари билан жиҳозланган Volkswagen автомобилларида Huawei компаниясининг 4G стандартига оид патентлардан (SEP) фойдаланиш мақсадини кўзлайди. Ушбу лицензия шартномаси – Huawei компанияси учун автомобилсозлик соҳасидаги бундай турдаги энг йирик битимдир.

Huawei компаниясининг юридик масалалар бўйича директори Сон Люпин шундай дейди: “Инновацион компания сифатида, Huawei симсиз технологиялар соҳасида энг йирик патентлар жамланмасига эга. Бу автомобил саноати учун жуда муҳим аҳамият касб этади. Биз ушбу соҳадаги йирик компаниялар бунинг аҳамиятини тан олаётганидан мамнунмиз. Биз ишонамизки, ушбу лицензия бутун дунёдаги истеъмолчиларга бизнинг замонавий технологияларимиздан фойдаланиш имкониятини тақдим этиш орқали уларга катта фойда келтиради”.

Huawei амалдаги лицензия шартномаси доирасида компаниянинг патент бўйича технологияларининг 30 миллиондан ортиқ автомобилларга татбиқ этилишини режалаштирмоқда.

Сўнгги 20 йил ичида Huawei Европа, АҚШ, Япония ва Жанубий Кореядаги дунёнинг энг йирик компаниялари билан патентли лицензиялаш бўйича 100 дан ортиқ шартномалар тузди. Huawei компанияси келгусида тармоққа тўлиқ уланган ақлли дунёни яратиш учун рақамли технологияларини транспорт воситаларида тобора кўпроқ жорий этишда давом этади.

Реклама ҳуқуқи асосида