Ливия соҳиллари яқинида 57 нафар муҳожир чўкиб кетди

Ливия соҳиллари яқинида ноқонуний муҳожирларни олиб кетаётган кеманинг ағдарилиб кетиши оқибатида 57 киши, жумладан 20 аёл ва 2 бола ҳалок бўлди. Қочқинлардан бир қисмини қутқариб қолишга муваффақ бўлинган.

Халқаро миграция ташкилоти матбуот котиби Сафи Мсехлининг таъкидлашича, Хомс шаҳри яқинида юз берган фожиада 57 нафардан кўпроқ одам ҳалок бўлган.

Айни вақтда Ливия африкалик муҳожирларнинг Европага етиб олишидаги асосий йўналишлардан бири бўлиб қолмоқда.

Аввалроқ 2021 йилда Европа иттифоқини кесиб ўтган ноқонуний муҳожирлар сони 2 маротаба кўпайгани маълум қилинганди. Ўрта Ер денгизининг ғарбий қисми орқали Европага асосан жазоирликлар ва марокашликлар, шарқий қисми орқали эса сурияликлар ва турклар йўл олади.

Шунингдек, Европада минглаб қочқин болалар йўқолиб қолгани маълум қилинган. Улардан аксарияти Марокаш, Жазоир ва Эритреядан келган болалар бўлган.