Яқин Шарқ ва Шимолий Африкада коронавируснинг тўртинчи тўлқини бошлангани эълон қилинди

Коронавируснинг “дельта” штамми Яқин Шарқ ва Шимолий Африкада касалланиш даражасининг ошишига олиб келди. Дунёнинг ушбу қисмида вируснинг тўртинчи тўлқини кузатилмоқда. Бу ҳақда ғарб ОАВ ЖССТнинг Шарқий Ўрта ер денгизи ҳудудий бюросига таяниб хабар берди.

“Янги касалланганлар ва шифохонага тушганларнинг аксариятини эмланмаган кишилар ташкил қилмоқда. Ҳозир биз минтақада коронавирус тарқалишининг тўртинчи тўлқинидамиз”, деб айтган бюро директори Аҳмад ал-Мандҳарий.

Айни вақтда “дельта” штамми минтақанинг 22 давлатидан 15тасида – Марокашдан тортиб Покистонгача қайд қилинган. ЖССТнинг минтақавий бюроси баёнотида таъкидланишича, ушбу штаммнинг аҳоли орасида айланиб юриши минтақа давлатларида коронавирус билан касалланиш ва ўлим ҳолатларининг кўпайишига олиб келмоқда. 

ЖССТ маълумотларига кўра, июлда коронавирус билан касалланиш даражаси июнга нисбатан 55 фоизга, ундан ўлим эса 15 фоизга ошган.  

Шунингдек, минтақанинг турли давлатларидаги интенсив даволаш палаталарида кислород баллонлари ва койкаларнинг фалокатли тарзда етишмаётгани маълум қилинмоқда. 

ЖССТнинг таъкидлашича, “дельта” штамми минтақада тез суръатлар билан устувор турга айланиб бормоқда.