Сенат ўзбекистонликларни хорижга ишга юборишда камчиликларга йўл қўйган раҳбар ишдан бўшатилганини маълум қилди

Россияга кетган ўзбекистонликларнинг ижтимоий тармоқлар орқали «Бизни қул қилиб сотиб юборганмисизлар?» деб қилган видеомурожаати ўтган ойда ижтимоий тармоқларда тарқалган, унда ваъда қилинган ойлик маошлари берилмаётгани, ишлаш ва яшаш учун шароит етарли эмаслиги, улар кунига 120-130 рубль (тахминан 20 минг сўм) эвазига ишлаётгани баён қилинган эди.

Шундан сўнг Олий Мажлис Сенати баёнот билан чиқиб, Ташқи меҳнат миграцияси агентлиги томонидан хорижга ишга юборилган ватандошлар шикояти назоратга олингани, Бандлик ва меҳнат муносабатлари вазирлигига ушбу ҳолат юзасидан тушунтириш берилиши бўйича сўров юборилгани маълум қилинган эди.

Парламент юқори палатасининг Ёшлар, маданият ва спорт масалалари қўмитаси томонидан олиб борилган ўрганиш давомида аниқланишича, Ташқи меҳнат миграцияси агентлиги ва Россиянинг Карачаево-Черкесия Республикасидаги “Южный Агрокомбинат” АЖ ўртасида 2021 йил 14 июнь куни имзоланган келишув шартномаси шартларига мувофиқ, 400 нафар фуқаро қишлоқ хўжалиги соҳасида ишлаши учун иш берувчи томонидан танлаб олиниши, ишга жалб қилиниши ва уларинг ойлик маошлари 33 минг рублдан 50 минг рублгача ташкил этиши белгиланган.

Фуқароларнинг авиачипта ва ҳужжатларни расмийлаштириш (патент) харажатлари иш берувчи ҳисобидан тўланган, ушбу харажатлар кейинчалик фуқароларнинг ойлик маошларидан қисман ушлаб қолиниши, фуқаролар 1 йил ишласа, ушлаб қолинган харажатлар иш берувчи томонидан тўлиқ қоплаб берилишига келишилган.

Жорий йилнинг 16 июнь куни иш берувчи ва Ташқи меҳнат миграцияси агентлигининг Андижон вилояти филиали томонидан танлов ўтказилиб, 150 нафар фуқаро танлаб олинган ҳамда 23 июнь куни 63 нафари, 29 июнь куни 22 нафари, 4 июль куни 16 нафари ва 5 июль куни 42 нафари “Южный Агрокомбинат” АЖга меҳнат фаолиятини амалга ошириш учун юборилган.

Сенат ахборотида, фуқаролар иш жойига етиб борганидан сўнг, Ташқи меҳнат миграцияси агентлигига телефон орқали меҳнат ва яшаш шароитлари ноқулайлиги ҳамда паспорт ҳужжатлари иш берувчи томонидан олиб кўйилганлиги тўғрисида бир қатор мурожаатлар келиб тушгани, шу сабабли Ташқи меҳнат миграцияси агентлиги бошлиғи ўринбосари бошчилигида ишчи гуруҳ тузилиб, жорий йилнинг 14 июль куни Россия Федерациясига учиб борган ва мазкур корхонада бўлгани келтирилади.

Сафар давомида ишчи гуруҳ корхона раҳбарияти ва фуқаролар билан учрашиб, уларнинг мурожаатларида кўтарилган масалалар бўйича музокара олиб борган. Иш берувчи фуқароларнинг паспортлари миграцион қайдга қўйиш ва ишлаш учун патент расмийлаштириш мақсадида олингани ҳамда фуқароларнинг биринчи талаби билан қайтариб берилишини маълум қилган.

Корхона раҳбари ўзбекистонлик ишчилар билан меҳнат муносабатларини қонунга мувофиқ расмийлаштириши, барча шароитларни яратиб бериши ҳамда бугунги кунда яна 500 та қўшимча ишчи кучи жалб қилиш режаси борлигини маълум қилган.

Таъкидланишича, ҳозирги кунда мазкур корхонада 155 нафар Ўзбекистон фуқароси, шундан 46 нафар самарқандлик 2019 йилдан буён, 109 нафар андижонлик эса 2021 йил июль ойидан буён ишлашмоқда.

“Ишчи гуруҳ корхона раҳбарияти билан Ўзбекистон фуқароларининг яшаш ва меҳнат шароитларини яхшилаш, ойлик маошларини ўз вақтида тўлаб бериш ҳамда ҳужжатларни расмийлаштириш жараёнини тезлаштириш бўйича келишув далолатномасини расмийлаштирган.

Корхонада ишлаётган Ўзбекистон фуқароларига ушбу келишувнинг мазмун-моҳияти, ойлик маошларини тўлаш тартиби, иш вақти ва ҳужжатлар расмийлаштириш жараёнлари тушунтирилган. Жумладан, фуқаролар видеомурожаатида айтиб ўтилган 125-130 рубль миқдоридаги маош бир кунлик эмас, балки бир соатлик иш ҳақи эканлиги маълум қилинган.

Шунингдек, юқорида қайд этилган видеомурожаат бир соатга тўланадиган иш ҳақи бир кунга берилади деб, нотўғри тушуниш оқибатида жорий йилнинг 15 июль куни, яъни мурожаат ёзган фуқаролар иш бошлаган биринчи кунида олинганлиги маълум бўлган.

Бугунги кунда Ташқи меҳнат миграцияси агентлиги ва унинг Россия Федерациясидаги ваколатхонаси томонидан ушбу корхонада фаолият олиб бораётган фуқаролар билан мунтазам равишда алоқа ўрнатилиб, уларнинг яшаш ва ишлаш шароитлари доимий назоратга олинган, 2021 йил 29 июль куни корхонага такроран ишчи гуруҳ хизмат сафарига юборилган.

Шунингдек, ижтимоий тармоқларда юкоридаги видеомурожаат жойлаштирилганидан бир кун ўтиб унинг муаллифи Н.Назиров томонидан мурожаатдаги важлар асоссизлиги ва англашилмовчиликлар бўлганлиги тўғрисидаги мурожаат ижтимоий тармоқларга жойлаштирилган.

Шу билан бирга, фуқароларни ташкилий ишга жойлаштириш жараёнида камчиликларга йўл қўйганлиги сабабли Ташқи меҳнат миграцияси агентлигининг Андижон филиали раҳбари У.Йўлдошев билан меҳнат шартномаси бекор қилинган”, дейилади Сенат хабарида.