Мадридда “Ндрангета” италян жиноий синдикатининг етакчиси ҳибсга олинди

Мадридда италян мафияси боссларидан бири, дунёдаги энг бой жиноий гуруҳлардан бири – “Ндрангета” жиноий синдикатининг етакчиси Доменико Павильянити ҳибсга олинди.

60 ёшли Павильянити италиялик карабинерлар билан ўтказилган қўшма амалиёт давомида қўлга олинган. Унинг ёнидан Португалиянинг қалбаки ҳужжатлари, 6та мобил телефон ва 6 минг евро топилган.

Полициянинг таъкидлашича, Павильянити Италиянинг Калабрия регионида жойлашган “Ндрангета” жиноий синдикатининг етакчиси ҳисобланади. 

Павильянити шу йилнинг январ ойида бир қатор жиноятлар, жумладан қотиллик ва гиёҳвандфурушлик учун сиртдан 11 йил 8 ой 15 кунга озодликдан маҳрум этилганди.

Аввал у Италияда умрбод қамоқ жазосига ҳукм қилинган. Бироқ кейинроқ жазо муддати 30 йилгача қисқартирилиб, Павильянити 2019 йил октябрда озодликка чиқарилган.

Шундан кейин у Испанияга қочиб кетган. Бу ерда унга шериклари ёрдам бериб турган.

Терговчиларнинг таъкидлашича, “Ндрангета” кокаин сотишдан олган ўн миллиардлаб доллардан ўз жиноий таъсирини Европа, Австралия, Шимолий ва Жанубий Америка ҳамда Африкага ёйиш учун фойдаланган.

Италияда 2021 йил бошида мафия устидан 30 йил ичидаги энг катта суд жараёни бошланганди. Унинг доирасида “Ндрангета”нинг 355 аъзоси судга тортилган.