«Tahoe», «Trailblazer» ва янги хонадон калитлари. Токио-2020 иштирокчилари қандай кутиб олинади?

Бугун, 9 август куни Тошкентда Токио-2020 ёзги Олимпия ўйинларида иштирок этган Ўзбекистон делегациясини расмий кутиб олиш маросими ўтказилади.

Спортчилар ва расмий делегация жой олган самолёт соат 20:00да Тошкент халқаро аэропортига қўниши режалаштирилган.

Байрамона кутиб олиш тадбирида, жумладан, Олий Мажлис Сенати раиси Танзила Норбоева ва бош вазир Абдулла Арипов иштирок этиши кутилмоқда.

Маросимда совриндор спортчиларнинг ота-оналари ҳам сўзга чиқиши режа қилинган. Юлдуз Усмонова, Ёдгор Саъдиев ва Озодбек Назарбеков каби санъаткорлар тадбирга таклиф этилган.

Аввалроқ, медал билан қайтаётган спортчиларга президент совғаси сифатида «Tahoe» ва «Trailblazer» автомобиллари ҳозирланаётгани видеоси тарқалганди.

Tribuna.uz маълумотига кўра, совриндорларга автомобилдан ташқари хонадон калитлари ҳам топширилади.

#Баҳодир Жалолов #Акбар Жўраев #Улуғбек Рашидов