Украина ўз ҳудудида АҚШнинг ракета ҳужумидан мудофаа бўлинмаларини жойлаштиришни таклиф қилди

Алексей Резниковнинг сўзларига кўра, Киев Россиянинг Қримда ядро қуролини жойлаштириш мақсадидан хавотирланмоқда.

Фото: Reuters

Украина ўз ҳудудида АҚШнинг ракета ҳужумидан мудофаа бўлинмаларини жойлаштириш таклифини илгари сурди. Бу ҳақда Украина бош вазири ўринбосари Алексей Резников АҚШга ишчи ташрифи чоғида "Жеймстаун" фонди раҳбари Глен Ҳовард билан учрашувида айтди.

«Украина учун хавфсизлик соҳаси пакетини кенгайтириш зарур. Биринчи навбатда Американинг ракета ҳужумидан мудофаа бўлинмаларини жойлаштириш ҳисобига. Бизнинг қонунчилигимиз бунга изн беради», — деди у.

Резниковнинг сўзларига кўра, Киев Россиянинг Қримда ядро қуролини жойлаштириш мақсадидан хавотирланмоқда.

«Россия де-факто Азов денгизини эгаллаб олди ва Қора денгиздаги мувозанатни буткул ўзгартириб юборди. Биз Россиянинг Қримда ядро қуроли жойлаштиришга қаратилган ҳаракатларидан хавотирдамиз», — деб таъкидлади у.