Хитой-ўзбек вакцинасининг иккинчи ва учинчи дозалари билан эмлаш давом этади

«Бугундан бошлаб аҳолини ZF-UZ-VAC2001 вакцинасининг иккинчи ва учинчи дозалари билан эмлаш яна қайта йўлга қўйилди», дейилади ССВ матбуот хизмати хабарида.

Эслатиб ўтамиз, 9 августдан бошлаб Ўзбекистондаги барча эмлаш пунктларида захирадаги хитой-ўзбек вакцинасини фақат биринчи доза билан эмлаш ишлари амалга оширилиши жорий этилганди.

ССВ иммунизация ишлари бўйича раҳбари Дилором Турсунова вакциналарнинг ҳисоб-китобини тўғрилаб олиш, emlash.uz сайтига тўғри маълумотларни киритиш ҳамда вакцинанинг 2- ва 3-дозасини олишни режалаштирган фуқаролар рўйхатини тартибга солиш учун бир ҳафталик топшириқ берилганлигини маълум қилганди.

Санитария-эпидемиологик осойишталик ва жамоат саломатлиги хизмати раҳбари ўринбосари Нурмат Отабеков ZF-UZ-VAC-2001 вакцинасининг 2- ва 3-дозалари билан эмлаш 1 ҳафтага тўхтатилгани юзасидан аудиобаёнот билан чиққан, аҳолининг катта қисмида қисман бўлса ҳам иммунитет шакллантириш учун айнан олиб келинган вакцинани аҳоли учун 1-доза вакцинани ишлатишга қарор қилинганини айтганди.

«Айнан ўзбек-хитой вакцинаси билан эмлаш тадбирлари таҳлиллари шуни кўрсатдики, 2-маротаба эмланиши керак бўлган аҳолининг 50 фоизи, 3-маротаба эмланиши керак бўлган аҳолининг 70 фоизи эмлаш тадбирларига келмаган. Бундан кўриниб турибдики, биз агар уларни 2- ва 3-дозани олиши учун келишларини кутиб ўтирсак, вақтдан ютқазамиз.

Шу боис ҳам аҳолининг катта қисмида қисман бўлса ҳам иммунитет шакллантириш учун айнан олиб келинган вакцинани аҳоли учун 1-доза вакцинани ишлатишга мақсадга мувофиқ деб топдик. Негаки биз биринчи маротаба эмлашимиз орқали касалликка қарши қисман иммунитет шакллантиришимиз, қолаверса, касаллик юққан тақдирда ҳам уни оғир асоратлар билан кечишига йўл қўймаслигимиз мумкин бўлади», деганди у.