Францияда афғонистонлик қочқин толиблар билан алоқадорликда гумонланиб қўлга олинди

Францияда Кобул аэропортидан эвакуация қилинган афғонистонлик қочқин “Толибон” ҳаракати билан алоқадорликда гумонланиб қўлга олинди. Бу ҳақда Франция ҳукумати вакили Габриэл Аттал маълум қилди.

ОАВнинг маълумот беришича, қўлга олинган шахс “Толибон” билан ҳамкорлик қилишда гумонланган бошқа бир шахс билан яқин алоқада бўлган. Улар кузатув остига олинган ҳамда назоратда бўлиш шартини бузгани учун қичқинлардан бири ушланган.

Франция ички ишлар вазири Жералд Дарманеннинг айтишича, у тарк этмаслиги лозим бўлган ҳудуд ташқарисига чиққани учун қўлга олинган.

Атталнинг сўзларига кўра, асосий гумонланувчи Афғонистондан французларни эвакуация қилишда “ўта қийин онларда ёрдам берган, одамлар ҳаётини қутқарган. Аммо у толиблар билан ҳам алоқада бўлган ва буни аниқлаш зарур”.