“Бу – ортдан урилган пичоқ”. Франция АҚШ, Британия ва Австралиянинг мудофаа альянси ташкил этишига нисбатан норозилик билдирди

Франция ташқи ишлар вазири Жан Ив ле Дриан АҚШ президенти Жо Байденни Австралия ва Британия билан альянс тузиш орқали ортдан зарба беришда айблади. Бу ҳақда Reuters хабар бермоқда.

АҚШ ва Британия билан ҳамкорлик эълон қилган Австралия сувости кемаларини ишлаб чиқиш бўйича Франция билан имзоланган 40 млрд долларлик шартномани бекор қилди.

“Бу шафқатсиз, бир томонлама ва аввалдан маълум бўлмаган қарор кўп жиҳатдан жаноб Трампнинг ишини эслатмоқда. Жудаям жаҳлим чиқди. Иттифоқчилар бундай қилмайди”, – деди Ле Дриан France Info радиосига берган интервьюсида.

Қайд этилишича, Австралия 2016 йилда қиймати 40 млрд долларлик янги сувости флотини қуриш учун Франциянинг Naval Group кемасозлик компаниясини танлаган. Икки ҳафта аввал Австралия ташқи ишлар ва мудофаа вазирлари Франция билан келишувни тасдиқлаган. 

“Бу орқадан урилган пичоқ бўлди. Биз Австралия билан ишончли муносабатлар ўрнатгандик ва бу ишончга путур етди”, – деб таъкидлади Ле Дриан.

Аввалроқ Байден Франция “Ҳинд-Тинч океани ҳудудида асосий ҳамкор бўлиши”ни айтган. Австралия ташқи ишлар вазири эса Франция билан “изчил ва ижобий ҳамкорлик” давом этишига умид билдирган.

Эслатиб ўтамиз, АҚШ, Британия ва Австралия AUKUS мудофаа альянсини ташкил этишди. Таъкидланишича, “Бу Ҳинд-Тинч океани минтақасида барқарорликка ёрдам беради”.