АҚШ очарчиликка қарши курашишга 10 млрд доллар ажратади

АҚШ очарчиликка қарши курашиш ва дунёдаги озиқ-овқат тизимларини мустаҳкамлаш ишларига 10 млрд доллар ажратади. Бу ҳақда АҚШ маъмурияти вакили БМТнинг озиқ-овқат тизимлари бўйича саммитига бағишланган брифингда маълум қилди.

“Президент Жо Байден АҚШ очарчиликка барҳам бериш ва озиқ-овқат тизимларини мустаҳкамлаш ишлари учун 10 млрд доллар йўналтиришга ваъда берганини кўпчилигингиз эшитгансиз деб ўйлайман. Ушбу маблағнинг 5 млрд доллари Қўшма Штатлар учун, яна 5 млрд доллари бошқа мамлакатлар учун ажратилади”, – деди у.

Унинг сўзларига кўра, ушбу маблағ беш йил давомида ажратилади.

Июл ойида БМТ бош котиби Антониу Гутерриш 2020 йилда дунё бўйича камида 811 млн киши очарчиликка дуч келганини маълум қилганди.

Унинг сўзларига кўра, бу рақам 2019 йилдагига нисбатан ошган.