Адлия вазирлиги: “Қонун лойиҳасида тезликни оширганлик учун жаримани камайтириш бўйича таклифлар мавжуд эмас”

Адлия вазирлиги Жамоатчилик билан алоқалар бўлими бошлиғи Севара Ўринбоеванинг Kun.uz’га маълум қилишича, турли баҳс-мунозараларга сабаб бўлаётган тезликни оширганлик учун жаримани камайтириш таклифи Вазирлик томонидан ишлаб чиқилган қонун лойиҳасида мавжуд эмас.

Унинг айтишича, 24 сентябр куни Олий Мажлис Қонунчилик палатасининг навбатдаги мажлисида “Ўзбекистон Республикасининг Маъмурий жавобгарлик тўғрисидаги кодексига ўзгартиш ва қўшимчалар киритиш ҳақида”ги қонун лойиҳасини кўриб чиқиш жараёнида адлия вазири Русланбек Давлетов ҳам ижтимоий тармоқларда кенг муҳокама қилинаётган таклиф қонун лойиҳасида йўқлигини таъкидлаган.

Севара Ўринбоеванинг қўшимча қилишича, қонун лойиҳаси депутатлар томонидан эътирозларсиз, биринчи ўқишда қабул қилинган.

Эслатиб ўтамиз, август ойида Адлия вазирлиги томонидан эълон қилинган қонун лойиҳасида ҳайдовчилар томонидан содир этилган бир қатор ҳаракатлар учун маъмурий жавобгарликни бекор қилиш ва енгиллаштиришга қаратилган ўзгартишлар назарда тутилганди.

Олий Мажлис Қонунчилик палатаси депутати, ЎзХДП фракцияси аъзоси Фирдавс Шарипов “фуқаролар томонидан бугунги кунда қўлланаётган жарималар миқдори юқорилиги бўйича эътирозлар билдирилаётгани” сабабли фракция депутатлари томонидан транспорт воситалари ҳайдовчиларининг белгиланган ҳаракат тезлигини соатига 20 километрдан ортиқ, лекин 40 километрдан кўп бўлмаган катталикда ошириб юборганлиги учун жарима миқдорини камайтириш ҳақида қонун лойиҳасига таклиф берилганини маълум қилгач, ушбу ҳолат жамоатчилик томонидан кескин эътирозларга сабаб бўлди.