Туркия АҚШ қўшинлари Ироқ ва Суриядан Афғонистондан кетгани каби кетишини истайди – Эрдўған

Туркия АҚШ Ироқ ва Суриядан ўз қўшинларини Афғонистондан олиб чиққани каби олиб чиқишини истайди. Бу ҳақда Туркия президенти Ражаб Тоййиб Эрдўған CBS телеканалига берган интервьюсида айтиб ўтди.

Фото: Getty Images

“Агар менда танлов бўлганда, улар (АҚШ қўшинлари) Сурия ва Ироқдан Афғонистондан кетгани каби кетишини истардим. Чунки биз бутун дунёда тинчлик ўрнатмоқчи бўлсак, бу ҳудудларда қолишдан бошқа маъно йўқ. Биз бу халқларга, у ердаги маъмуриятларга шунчаки ўзлари қарор қабул қилишлари имконини беришимиз мумкин”, деб тегишли саволга жавоб қилган Эрдўған.

Туркия президентига “Агар бу юз берса, Туркия Сурияда АҚШ ўрнини эгаллашни исташини англатадими?” деб савол берилган. “Менга аниқ ва ростини айтишга имкон беринг: биз ҳеч қачон қолишимиз исталмаётган жойда қолмаймиз. Бизга мамнун бўлишмайдиган жойда ҳеч қачон бўлмаймиз”, деб жавоб қилган Эрдўған.

У Туркия, АҚШ, Россия ва Эрон Сурия ҳамда Ироқда тинчлик ўрнатилиши устида биргаликда ишлай олишига умид қилишини айтган.