22 минг хонадонда енгил конструкцияли иссиқхоналар қуриб берилади - Шавкат Мирзиёев

Андижон вилоятида 22 минг хонадонда енгил конструкцияли иссиқхоналар қуриб берилади. Бу ҳақда Шавкат Мирзиёев маълум қилди.

“Булоқбоши тажрибаси” асосида 145 минг хонадонда 2,5 минг гектар узумзор барпо этилади. Аҳоли томорқалари сув таъминотини яхшилаш орқали 5 мингдан ортиқ аҳоли бандлиги таъминланади. Масалан, Марҳамат, Улуғнор ва Бўстон туманларида 60 та катта ҳажмдаги қудуқлар қазилиб, 2,5 минг хонадон томорқасининг сув таъминоти яхшиланади.
Янги ўзлаштириладиган ерлар ҳамда Қўрғонтепа, Жалақудуқ ва Улуғнорда пахта ва ғалла майдонларини қисқартириш ҳисобидан озуқа экинлари майдони 6,5 минг гектарга кенгайтирилади.
Бундан ташқари, ҳар бир туманда йилига 2 мингта хонадонга 100 бошдан, беш йилда жами 14 миллион бош парранда тарқатилиб, аҳолининг даромади оширилади.
Шунингдек, 6 та балиқчилик кластерлари ташкил этилади ҳамда 2,5 минг гектар сув ҳавзаларидаги ҳосилдорлик 4-5 баробар оширилади”, деди президентликка номзод.