Самарқандда тадбиркорларнинг 548,5 миллион сўмлик мулкини ўзлаштирган шахсларга жиноят иши қўзғатилди

Самарқанд вилояти Пайариқ туманида тадбиркорларнинг 548,5 миллион сўмлик мулкини ўзлаштирган шахсларга жиноят иши қўзғатилган. Бу ҳақда Бош прокуратура ҳузуридаги иқтисодий жиноятларга қарши курашиш департаменти хабар бермоқда.

Маълум қилинишича, Бош прокуратура ҳузуридаги департаментнинг Пайариқ туман бўлими томонидан тадбиркорлик ўтказилган терговга қадар текширувда бир гуруҳ шахслар тадбиркорларнинг маблағларини ўзлаштиргани аниқланган.

Жумладан, фуқаро Т.М. ва бошқалар тумандаги «D.» МЧЖ ҳамда «M.» оилавий корхонасини бошқарган даврида Тошкент шаҳридаги «D.» ва «P.» МЧЖлар ҳамда «E.» хусусий корхонасининг 548,5 миллион сўмлик мулкини фирибгарлик йўли билан қўлга киритган.

Бундан ташқари, улар фуқаро Ш.нинг ишончига кириб, унинг номига юқоридаги субъектлардан 171 миллион сўмлик мебель жиҳозларини қабул қилиб олганлиги тўғрисида ҳужжатларни расмийлаштирган. Сўнг маҳсулотлар сотувидан тушган нақд пулни банк муассасасига топширмасдан савдо қоидаларини бузганликлари аниқланган.

Қайд этилишича, мазкур ҳолатлар юзасидан Жиноят кодексининг 168-моддаси (фирибгарлик) ва 189-моддаси (савдо ёки хизмат кўрсатиш қоидаларини бузиш) билан жиноят иши қўзғатилган. Ҳозирда тергов ҳаракатлари ўтказилмоқда.