Қашқадарёда 2019–2020 йилларда 562 нафар мансабдор коррупцион жиноят содир этгани учун жиноий жавобгарликка тортилгани маълум қилинди

Қашқадарё вилоятида 2019–2020 йилларда 562 нафар мансабдор шахс коррупцион жиноят содир этгани учун жиноий жавобгарликка тортилган. Уларнинг 18 нафари вилоят ва 544 нафари туман даражасидаги давлат идоралари мансабдор шахслари бўлган. Бу ҳақда вилоят Коррупцияга қарши курашиш Кенгашининг навбатдаги йиғилишида маълум қилинган.

Маълум қилинишича, жорий йил 15 октябрь куни Қашқадарё вилояти Коррупцияга қарши курашиш Кенгашининг навбатдаги йиғилиши бўлиб ўтган. Йиғилишда коррупцион ҳолатларнинг олдини олишда кенг жамоатчиликнинг ўрни беқиёс экани таъкидланган.

Коррупцияга қарши кураш бўйича кўрилаётган тизимли чораларга қарамасдан, бюджет маблағларидан фойдаланиш, давлат харидлари, капитал қурилиш, лицензия ва рухсатномаларни олиш, банк кредитларини ажратиш, ишга қабул қилиш каби йўналишларда коррупция ҳолатлари сақланиб қолаётгани маълум қилинган.

Қайд этилишича, Қашқадарё вилоятида 2019–2020 йиллар давомида жами 562 нафар турли даражадаги мансабдор шахс коррупцион жиноят содир этгани учун жиноий жавобгарликка тортилган. Уларнинг 18 нафари вилоят ва 544 нафари туман даражасидаги давлат идоралари мансабдор шахслари бўлган.

Масалан, Косон тумани ҳокимининг ўринбосари А.Х. тадбиркорлик фаолиятини ташкил этмаган 6 нафар яқин қариндошлари, жумладан келини М.Т., қудаси О.К., ҳайдовчисининг турмуш ўртоғи С.С., унинг синглиси А.С. номига 180 миллион сўм кредит маблағлари ажратилишига эришиб, ушбу маблағларни нақдлаштирган ҳолда талон-торож қилиб юборган.

Шунингдек, Қашқадарё вилоятида бюджет буюртмачилари томонидан «dxarid.uz» махсус ахборот порталига жойлаштирилган давлат харидларига оид май-июль ойларидаги эълонлар масофавий мониторинг қилинганда қатор қонунбузилиш ҳолатлари аниқланган. Жумладан, қиймати 12,5 миллиард сўмлик 41 та танлов эълонида «Давлат харидлари тўғрисида»ги ва «Рақобат тўғрисида»ги Қонунларнинг талаблари бузилган.

Йиғилиш якунида бу каби ҳолатларнинг олдини олиш бўйича манзилли режа тузилиб, кенг жамоатчиликни жалб этган ҳолда ишларни ташкил этишга келишиб олинган.