Самарқандда қарздор ота фарзандлари вояга етгунча бўлган муддатни ҳисоблаб 202 миллион сўм алимент тўлади

Самарқанд вилояти Булунғур туманида қарздор ота фарзандлари вояга етгунча бўлган муддатни ҳисоблаб 202 миллион сўм алимент тўлаган. Бу ҳақда Kun.uz’га МИБ вилоят бошқармаси ахборот хизмати хабар берди.

Фото: Kun.uz

Маълум қилинишича, Фуқаролик ишлари бўйича Жомбой туманлараро судининг 2021 йил 9 июндаги қарорига асосан қарздор И.Н.дан ундирувчи Б.Р.га икки нафар фарзанди таъминоти учун даромадининг маълум қисмидан алимент ундириш белгиланган. Суд қарорига асосан МИБ Булунғур туман бўлими томонидан ижро иши юритилган.

Мазкур ижро ҳужжатига асосан қарздорнинг мол-мулкларини аниқлаш мақсадида “Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 21, 87-моддаларига асосан тегишли ташкилотларга сўровномалар юборилган. Олинган маълумотларга асосан қарздор отанинг барча мол-мулкларига тақиқ қўйилган.

Муқим даромади бўлмаган, кам таъминланган ва ижтимоий ҳимояга муҳтож аҳолини қўллаб-қувватлаш кераклиги инобатга олиниб, МИБ ходимлари қарздор И.Н. билан суҳбат ўтказган. Унга фарзандларини моддий қўллаб-қувватлаш ҳар бир отанинг бурчи экани тушунтирилган.

Бундай маслаҳат ва суҳбатдан ўзига тўғри хулоса чиқарган қарздор ота фарзанди вояга етгунига қадар бўлган муддат учун ҳисобланган 202 миллион 164 минг сўмни тўлаб берган. Шундан сўнг мазкур суд ҳужжати ундирувчининг аризаси билан қонуннинг 40-моддаси 1-бандига асосан тамомланган.

Самарқандда мол-мулкига тақиқ қўйилган қарздор ота фарзандлари учун 189,5 миллион сўм алимент тўлади

Самарқандда қарздор ота фарзандлари учун 367 миллион сўм алимент тўлади