Пекин бутун сайёрани айланиб чиққан гипертовушли ракета синовини ўтказгани тўғрисидаги хабарни рад этди

Хитой июл ойида Financial Times газетаси хабар берганидек гипертовушли ракета эмас, космик қурилмани синовдан ўтказган, деб маълум қилди Хитой ташқи ишлар вазирлиги вакили Чжао Лицзян.

«У ракета эмас, космик қурилма эди», – деди у.

Ўтган ҳафтада Financial Times газетаси ўз манбаларига таяниб Хитойнинг гипертовуши ракетаси нишонни уришдан олдин бутун сайёрани айланиб чиққани ҳақида хабар берганди.

Нашр манбаларининг таъкидлашича, Хитой Қўшма Штатлар разведкасини саросимага солиб қўйган илғор космик салоҳиятини намойиш этган.

Уларнинг сўзларига кўра, ракета нишондан атиги бир неча ўн метр нарига тушган.

Экспертларнинг фикрича, агар гипертовушли ракета Антарктида орқали парвоз қиладиган бўлса, Хитой АҚШга ракетага қарши мудофаа тизими жойлаштирилмаган жанубий йўналиш томондан зарба бериши мумкин.