Трамп ўзининг янги ижтимоий тармоғи ёрдамида “АҚШни цензурадан қутқариш”ни ваъда қилди

АҚШ собиқ президенти Доналд Трамп ўзининг TRUTH Social ижтимоий тармоғида цензура, “тушунарсиз блоклашлар, демонетизация ва сиёсий мақсадлардаги фирибгарликлар” бўлмаслигини ваъда қилди. 

“Ўтган ҳафтада йирик технологик корпорацияларнинг устунлигига рақобатчи бўладиган янги компания ҳақида гапиргандим. Бу мен учун сиёсат билангина боғлиқ эмас. У мамлакатимизни қутқариш билан боғлиқ”, — дейилади Трампнинг баёнотида.

Унинг фикрича, АҚШ “цензуранинг хавфли йўлидан юрди”, мамлакат аҳолиси “ўзини ҳакам деб эълон қилганлар гуруҳининг” буйруқларини тинглашга мажбур.

Оқ уй собиқ раҳбарининг сўзларига кўра, “цензура билан боғлиқ энг оғир вазият” ижтимоий тармоқларда кузатилмоқда. Трамп ўзи ҳам президентлик даврида блоклаш қурбонига айланганини эслатиб ўтди.

21 октябр куни Трамп TRUTH Social ижтимоий тармоғи яратилганини эълон қилди. Унинг сўзларига кўра, сервиснинг бета-версияси “таклиф қилинган меҳмонлар” учун ноябрда ишга тушади, 2022 йил бошидан эса ундан барча фойдаланиши мумкин бўлади.