Хитойда коронавирус тарқалиши авж олмоқда

Бир ҳафта ичида Хитойнинг ўн бир провинциясида коронавирус юқтириш билан боғлиқ юздан ортиқ янги ҳолатлар тасдиқланди. Бу ҳақда Хитой соғлиқни сақлаш миллий комиссияси вакили Ми Фэн маълум қилди.

17 октябрдан буён бир нечта маҳаллий инфекция ўчоқлари аниқланди ва касаллик тез тарқалмоқда. Мамлакат аҳолисининг 75 фоиздан ортиғи коронавирусга қарши эмлангани ҳам инфекция тарқалишини  тўхтата олмаяпти. 

Дастлабки ҳолатлар 16 октябр куни шанҳайлик тўлиқ эмланган туристлар гуруҳи орасида аниқланганди. Қайд этилган 133та ҳолатдан 106таси 13та туристлар гуруҳи билан боғлиқ.

Янги ҳолатлар Ички Мўғулистон, Гансу, Нинся, Гуйчжоу, Ланчжоу ва Пекинда қайд этилган.

Ҳозирда туристик агентликларга бу ҳудудларга саёҳатлар уюштириш тақиқланди, пойтахтга киришга чекловлар жорий этилди.