Британияда яшаш жойига айлантирилган ядро бункери сотувга қўйилади

Британияда ташқи томонига бетон қопланган ва кўриниши ёқимсиз ядро бункери 1,4 млн фунт стерлинг нарх билан сотувга қўйилади. Унинг ичида премиум тоифадаги бир нечта хонадон жойлашган, деб ёзади The Sun.

Мистли қишлоғида жойлашган ядро бункери учта ҳашаматли хонадонга айлантирилган. У шу ой охирида аукционга қўйилади.

Ҳимоя бункери 1951 йилда қурилган. У ядровий ҳужум вақтида ҳукумат амалдорларини ҳимоя қилишга мўлжалланган. Бункернинг ташқи томони танк зирҳи ва қалинлиги 60 сантиметрли бетон билан қопланган.

Ҳозирда унинг ичида битта тўрт хонали ва иккита уч хонали хонадон жойлашган. Ҳимоя қатлами сақлаб қолинган хонадонлар дизайнерлар томонидан муҳташам қилиб безатилган.