Зеленский олигархларнинг сиёсатга таъсирини чекловчи қонунни имзолади

Украина президенти Владимир Зеленский “Олигархлар ҳақидаги қонун” деб аталаётган қонунни имзолади. Унга кўра, Украинада кун кўриш учун зарур бўлган энг кам пулнинг 1 миллион миқдоридан кўпроқ (2,19 млрд гривен ёки 84 млн доллар) бойликка эга бўлган фуқароларнинг мамлакат сиёсий ҳаётига таъсири чекланади.

“Олигархларга қарши қонунни имзоладим. Ушбу ҳужжат йирик бизнес ва сиёсатчилар ўртасидаги муносабатларни тубдан ўзгартиради. Эндиликда барча иқтисодий ўйинчилар қонун олдида баробар бўлади ва ўзига сиёсий имтиёзларни сотиб ололмайди. Қонуннинг синдирилишига йўл қўймаймиз!” деб ёзган Зеленский. 

Унинг таъкидлашича, Европанинг барча муваффақиятли давлатларида олигархлар деб номланувчи ҳокимият бўғини йўқ. “Ушбу давлатларда ҳокимият бир гуруҳ бойваччалар учун эмас, балки ўз фуқаролари манфаатлари учун ишлайди. 2019 йилги сайловларда фуқароларимиз Украинада айнан шундай ўзгаришлар юз бериши учун овоз беришганди”, деб қўшимча қилган Украина етакчиси. 

Таъкидланишича, ушбу қонун йирик бизнесни сиёсий курашдан ажратиш ва мамлакат иқтисодий ҳаётига олигархларнинг салбий таъсирини чеклашни таъминлайди. 

Ушбу қонун билан олигарх деб кимни қабул қилиш учун мезонлар ўрнатилади. Жумладан, олигарх деб бир вақтда камида ушбу учта мезонга жавоб берувчи жисмоний шахсларга айтилади: сиёсий ҳаётда иштирок этади, ОАВга катта таъсир кўрсатади, бозорда монопол ҳолатни эгалловчи субъектнинг эгаси ва камида бир йил давомида ушбу ҳолатни қўллаб-қувватлаб келган шахс.

Зеленский олигархларга қарши кураш бошланиши ҳақида март ойида эълон қилган. Ўшанда у давлат захиралари, табиий бойликлари, стратегик корхоналар ва конституциявий суднинг ноқонуний ўзлаштирилиши сабабли “адолат тикланишини” айтган.