Қоидабузарликларни жарима баллари асосида баҳолаш тизимига оид ҳукумат қарори лойиҳаси эълон қилинди

Вазирлар Маҳкамасининг “Йўл ҳаракати қоидабузарликларини жарима баллари асосида баҳолаш тизимини жорий этиш тўғрисида”ги қарори лойиҳаси эълон қилинди.

2023 йилнинг 1 январидан бошлаб, йўл ҳаракати қоидабузарликларини жарима баллари асосида баҳолаш тартиби жорий этилиши кутиляпти.

Белгилаб қўйилишича, йўл ҳаракати қоидабузарликларини жарима баллари асосида баҳолаш йўл ҳаракати хавфсизлигини таъминлаш борасидаги қўшимча чора ҳисобланади. Йўл ҳаракати қоидабузарликлари учун жарима баллари Ички ишлар вазирлиги Давлат йўл ҳаракати хавфсизлиги хизмати томонидан инсон омилисиз автоматлаштирилган тартибда электрон тизим орқали ҳисоблаб борилади.

Ҳайдовчига нисбатан транспорт воситасида йўл ҳаракати қоидаларини бузганлик учун жарима балларининг қўлланиши, шунингдек, балларнинг умумий миқдори ўн икки ёки ундан ортиқ баллга тенг бўлганда ҳайдовчилик гувоҳномасидан маҳрум этиш уни қонунда назарда тутилган асосий жазодан озод этмайди. Йил мобайнида йўл ҳаракати қоидаларини бузмаган транспорт воситалари ҳайдовчиларига, рағбатлантириш тариқасида, кейинги йилда йўл ҳаракати қоидаларини биринчи маротаба бузганлиги учун биринчи жарима балл ҳисобланмайди.

Белгилаб қўйилишича, ўн икки ва ундан юқори баллга тенг бўлган йўл ҳаракати қоидаларини бузганлик учун ҳайдовчилар томонидан қайта имтиҳон топширишда тўланадиган тўловлар қуйидаги тартибда тақсимланади: 90 фоизи – Давлат бюджетига; 10 фоизи - Ички ишлар вазирлигининг бюджетдан ташқари маблағлари ҳисобига ўтказилади ҳамда йўл-транспорт ҳодисаларининг олдини олишга қаратилган тарғибот ишлари, шунингдек ҳайдовчиларнинг мобил алоқа воситаларига хабар юбориш билан боғлиқ тадбирларни молиялаштиришга мақсадли йўналтирилади.

Ички ишлар вазирлиги Ахборот технологиялари ва коммуникaцияларини ривожлантириш вазирлиги, “Ўзбекистон почтаси” АЖ билан биргаликда 2023 йилнинг 1 январигача ўрнатилган тартибда электрон шаклда жарима баллари бериш ва ҳайдовчилар томонидан йўл ҳаракати қоидалари бузилганда уларни ҳисоблашнинг электрон тизимини ишлаб чиқади. Транспорт воситалари ҳайдовчиларининг умумий йўл ҳаракати қоидаларини бузганлик учун тўплаган баллари миқдори саккиз баллга тенг бўлганда, буюртма почта жўнатмаси ёки уларнинг мобил алоқа воситасига бу ҳақда “SMS” хабар юбориш орқали огоҳлантириш тартибини жорий қилади.

Шунингдек, ИИВ Адлия вазирлиги билан биргаликда жарима баллар асосида транспорт воситасини бошқариш ҳуқуқидан маҳрум этилган шахсларнинг электрон маълумотлар базасини жорий этади. Жарима баллар асосида транспорт воситасини бошқариш ҳуқуқидан маҳрум этилган шахсларга ишончномалар ва битишувларни расмийлаштиришда транспорт воситасини бошқаришни чеклашни назарда тутувчи тартибни ишлаб чиқади.

Йўл ҳаракати қоидабузарликларини жарима баллари асосида баҳолаш тартиби тўғрисидаги низомга кўра, ҳужжат қуйидагиларга нисбатан татбиқ этилмайди: Маъмурий жавобгарлик тўғрисидаги кодекс махсус қисми моддаларининг санкциясида тўғридан тўғри автомототранспорт воситасини бошқариш ҳуқуқидан маҳрум қилиш назарда тутилган қоидабузарликларга; йўл-транспорт ҳодисаси оқибатида жиноят иши қўзғатилган қоидабузарликларга; махсус автотранспорт воситаларини бошқараётган ҳайдовчиларга.

Ҳайдовчиларнинг йўл ҳаракати қоидаларига амал қилмаслик ҳолатлари йил давомида, ўн икки балли жарима асосида баҳолаб борилади. Биринчи маротаба ҳайдовчилик гувоҳномасини олган фуқароларнинг содир этган қоидабузарликлари ҳайдовчилик гувоҳномаси олган кундан бошлаб йил якунига қадар баҳоланиб борилади.

Жарима баллар ҳайдовчи биринчи қоидабузарлик содир этган кундан бошлаб кейинги йилнинг шу кунига қадар амалда ҳисобланади. Жарима баллар йил давомида ўн икки баллга етмаса, тўпланган баллар кейинги йил учун ҳисобланишига йўл қўйилмайди.